इभी किन्दै हुनुहुन्छ ? अटाे शाेमा यस्ता छन् बैंकका अफर (भिडियाेसहित)

काठमाडौं, २८ भदौ । काठमाडौंको भृकुटीमण्डपमा मंगलबारदेखि ‘नाडा अटो शो २०२३’ शुरू भइसकेको छ । १२० वटा स्टल रहेको मेलामा विभिन्न ४५ ब्रान्डका सवारीसाधन प्रदर्शनीमा छन्, जसमा १६ ब्रान्डका चारपांग्रे, २२ ब्रान्डका दुईपांग्रे र ७ ब्रान्डका लाइट कमर्सियल भेहिकलका स्टल छन् ।

यसैबीच, मेलामा नबिल, ग्लोबल आइएमई, सानिमा, प्रभु, हिमालयन, महालक्ष्मी र कामना सेवा विकास बैंकका स्टल राखिएका छन् । यी बैंकले ग्राहकका लागि अटो कर्जामा सस्तो र स्थिर ब्याजदर योजना ल्याएका छन् । उक्त मेलामा गाडी बुकिङ गर्नेका लागि यस्ता छन् विभिन्न बैंकका ब्याजदर योजना :

हिमालयन बैंक : हिमालयन बैंकले इभी र आइसीई दुवै गाडीका लागि ११.९९ प्रतिशतमा कर्जा दिने भएको छ । बैंकका अनुसार कात्तिक २७ गतेसम्म यो सुविधाको कर्जा सुविधा पाउन सकिनेछ । दुवै खालको गाडी खरिदमा ८ वर्ष सम्मको अवधि हुने गरी कर्जा दिइने बताइएको छ ।

नबिल बैंक: नबिलले ईभीको खरिदमा ५ र ७ वर्षका लागि स्थिर ब्याजदरको कर्जा सुविधा ल्याएको छ, जसअनुसार ५ वर्षका लागि १०.४९ प्रतिशत र ७ वर्षका लागि १०.९९ प्रतिशत स्थिर ब्याजदर रहेको छ । त्यस्तै, डिजेल पेट्रोल तथा आईसी इन्जिनका सवारीसाधनमा ५० प्रतिशत डाउन पेमेन्टमा कर्जा सुविधा रहेको बैंकले जनाएको छ ।

ग्लोबल आइएमई बैंक: अटो शो अवधिभरका लागि बैंकले १०.९९ प्रतिशत फिक्स्ड ब्याजदरमा ०.५० प्रतिशत सेवाशुल्कसहित अटो कर्जा सुविधा दिएको छ । साथै परिवर्तनीय ब्याजदरमा १.५ प्रतिशत प्रिमियम थप गरी ०.५० प्रतिशत सेवा शुल्कमा समेत बैंकको कर्जा सुविधा रहेको छ ।

सानिमा बैंक:  अटो शोको अवसरमा सानिमा बैंकले इभी र आईसीई दुवै गाडीमा ७ वर्षका लागि १०.९९ प्रतिशत स्थिर ब्याजमा कर्जा सुविधा दिनेछ । यसका लागि उक्त मेलामा गाडी बुकिङ गर्नुपर्नेछ । साथै, कर्जा सेवा शुल्क पनि ०.५ प्रतिशत मात्र लिइने बैंकले बताएको छ ।

प्रभु बैंक: प्रभु बैंकले ईभीलाई लक्षित गरी कर्जा सुविधा ल्याएको छ । इभीका लागि आधारदरमा २ प्रतिशत प्रिमियम लिँदै आएको बैंकले नाडा सो अवधिभरका लागि १ प्रतिशत प्रिमियमै कर्जा दिनेछ । जुन दर ५ वर्षका लागि कायम रहनेछ । साथै नाडा अटो शो भिजिट गरेको वा अटो शोमार्फत गाडी बुकिङ गरेर एक महिनाभित्र बैंकमा लागि जाँदा पनि यो सुविधा पाइनेछ ।

लक्ष्मी सनराइज बैंक: लक्ष्मी सनराइज बैंकले इभी र आईसीई दुवै गाडीमा ७ वर्षका लागि कर्जा सुबिधा ल्याएकाे छ । जस अन्तर्गत यस्ताे कर्जाकाे ब्याजदर  १.१ प्रिमियमसहित १२.१ प्रतिशत र १.५ प्रमियमसहित १२.५ प्रतिशत रहेकाे छ ।  यसमा १२.५ ब्याजदर अपरिवर्तनिय रहेकाे छ ।

महालक्ष्मी विकास बैंक :  अटो शोकै अवसरमा महालक्ष्मी विकास बैंकले पनि १२.९९ प्रतिशत ब्याजदरमा ३ वर्षका लागि इभी र आईसीई निजी गाडी खरिदमा कर्जा दिएको छ ।

कामना सेवा विकास बैंक:  कामना सेवा विकास बैंकले इभी खरिदमा ११.९५ प्रतिशत ब्याजदरमा ८० प्रतिशतसम्म कर्जा सुविधा दिएको छ । साथै, नाडा अटो शो अवधिभरका लागि इभीको खरिदमा मात्र आधार दरमा ०.१४ प्रतिशत प्रिमियममै कर्जा सुविधा रहेको छ । यसका लागि सेवा शुल्क पनि ०.७५ प्रतिशत मात्र लिइने बैंकले बताएको छ ।

उक्त योजना अनुसार शोमा गाडी बुकिङ गर्नेहरुका लागि बैंकहरुको आधार दरमा उनीहरुले प्रकाशित गरेको अधिकतम दर जोडेर ग्राहकले कति इएमआई तिनुपर्छ यसरी हेर्नुहोस