आज अमेरिका जाँदै प्रधानमन्त्री प्रचण्ड, काे काे छन् टाेलीमा ?
काठमाडौं, ३० भदाै । आज (शनिबार) प्रधानमन्त्री पुष्पकमल दाहाल ‘प्रचण्ड’ अमेरिका जाँदैछन्। संयुक्त राष्ट्रसंघको ७८ औं महासभामा भाग लिन प्रधानमन्त्री प्रचण्ड आज साँझ ६ बजे न्युयोर्क प्रस्थान गर्न लागेका हुन्।
प्रधानमन्त्री दाहालले बुधबार संयुक्त राष्ट्रसंघको महासभालाई सम्बोधन गर्ने कार्यक्रम छ।
उनले संयुक्त राष्ट्र संघको महासभामा आफूले नेपालले हासिल गरेका राजनीतिक उपलब्धिहरु अवगत गराउने, शान्ति प्रक्रियालाई तार्किक निष्कर्षमा पुर्याउन नेपालले गरिरहेको प्रयासमा अन्तर्राष्ट्रिय समुदायको सद्भाव खोज्ने, अतिकम विकसित मुलुकबाट दिगो र स्थायी रूपमा स्तरोन्नति हुन आइपरेका चुनौतीबारे विश्व समुदायको ध्यानाकर्षण गराउनेछन्।
प्रधानमन्त्री दाहालले अमेरिकामा प्रधानमन्त्री प्रचण्डले संयुक्त राष्ट्रसंघका महासचिव एन्टोनियो गुटेरेससहित विभिन्न देशका समकक्षीसँग द्विपक्षीय भेटवार्ता गर्नेछन्।
राष्ट्रसंघको महासभामा सहभागी भइ उनी त्यतैबाट असोज ५ मा चीन प्रस्थान गर्नेछन्। प्रधानमन्त्री दाहाल चीनमा १९ औं एसियाली खेलकुदको उद्घाटनमा सहभागी हुनेछन्।
