कात्तिकमा अधिकांश वाणिज्य बैंकले ब्याजदर घटाए, अधिकतम ब्याजदर ११ प्रतिशत
काठमाडौं, ३० असोज । हाल २० वटा वाणिज्य बैंक सञ्चालनमा छन् । यी बैंकले कात्तिक महिनाका लागि नयाँ ब्याजदर निर्धारण गरेका छन् । कात्तिकका लागि निर्धारण गरिएको नयाँ ब्याजदर अनुसार अधिकांश बैंकले ब्याजदर घटाएका छन् । चार वटा बैंकको कात्तिकको ब्याजदार भने स्थिर छ ।
ब्याजदर स्थिर राख्नेमा लक्ष्मी सनराइज, राष्ट्रिय वाणिज्य बैंक, माछापुुछ्रे र सिद्धार्थ बैंक छन् । माछापुच्छ्रे र सिद्धार्थ बैंकले असोजमा पनि ब्याजदर स्थिर राखेका थिए । यी चार बैंकले असोजमा व्यक्तिगत मुद्दतीमा ९.९९ प्रतिशत ब्याज दिँदै आएकोमा कात्तिकमा पनि सोही दरमा ब्याज दिने भएका हुन् ।
ब्याजदर सार्वजनिक गरेका वाणिज्य बैंकमध्ये १४ वटाले ब्याजदर घटाएका छन् भने एनएमबि र नेपाल एसबिआई बैंकले भने बढाएका छन् ।
कात्तिकमा सबैभन्दा बढी एनएमबि, एनआइसी एशिया र नेपाल एसबिआई बैंकले व्यक्तिगत मुद्दती खातामा अधिकतम ११ प्रतिशत ब्याज दिनेछन् । त्यस्तै नेपाल बैंक, सानिमा, प्रभु, एभरेष्ट र स्ट्याण्डर्ड चार्टर्ड बैंकले भने ९.२२ प्रतिशत ब्याज दिनेछन् ।
