सिंगापुरमा बिनोद चौधरी र बिल गेट्स बीच नेपालका स्वास्थ्य र रोजगारी क्षेत्रमा छलफल

काठमाडाैं, २४ वैशाख । सिंगापुरमा आयोजित फिलान्थ्रोपी एसिया एलायन्स २०२५ (पीएए-२०२५) सम्मेलनमा चौधरी ग्रुपका अध्यक्ष तथा सांसद बिनोद चौधरीले माइक्रोसफ्टका सह-संस्थापक तथा परोपकारी बिल गेट्ससँग भेटवार्ता गरेका छन्। उक्त भेटघाटमा नेपालको स्वास्थ्य र रोजगारी क्षेत्रमा रहेका चुनौतीहरूबारे दुवै नेताबीच विस्तृत छलफल भएको चौधरी ग्रुपको विज्ञप्तिमा उल्लेख गरिएको छ।

चौधरीले नेपालका केही महत्वपूर्ण क्षणहरूमा गेट्स फाउन्डेशनले पुर्याएको योगदानका लागि कृतज्ञता प्रकट गरे। विशेषगरी २०१५ को विनाशकारी भूकम्प, कोभिड-१९ महामारी र ‘सबल नेपाल’ कार्यक्रम अन्तर्गत बाल पोषणका पहलहरूमा गेट्स फाउन्डेशनको योगदानलाई चौधरीले उच्च सम्मान व्यक्त गरे।

सामाजिक सञ्जालमार्फत चौधरीले गेट्ससँगको भेटका केही विवरण साझा गर्दै गेट्स फाउन्डेशनलाई नेपालको सामाजिक क्षेत्रमा थप योगदान पुर्याउनका लागि विभिन्न सम्भावनाहरूबारे छलफल भएको बताए।

नेपालमा स्वास्थ्य र रोजगारी क्षेत्रमा गेट्स फाउन्डेशनले अन्य मुलुकहरूमा सफलतापूर्वक कार्यान्वयन गरेका मोडेलहरूलाई नेपालको सन्दर्भमा कसरी लागू गर्न सकिन्छ भन्ने विषयमा पनि छलफल भएको थियो।

चौधरी फाउन्डेशनले २०१५ को भूकम्पपश्चात् तत्काल राहत कार्यमा महत्त्वपूर्ण भूमिका खेलेको थियो। चौधरी फाउन्डेशनले करिब ३,००० भूकम्पप्रतिरोधी अस्थायी आवास निर्माण, विद्यालय पुनर्निर्माण र प्रभावित समुदायलाई खाद्यान्न तथा पानी वितरण गरेको थियो।

कोभिड-१९ संकटको समयमा चौधरी फाउन्डेशनले नेपालका विभिन्न अस्पतालहरूमा आइसियू र अक्सिजन प्लान्ट स्थापना गरेको थियो। साथै, देशका सातवटै प्रदेशमा अक्सिजन कन्सन्ट्रेटर, पीपीई किट, पीसीआर परीक्षण उपकरण र एन-९५ मास्क वितरण गरेको थियो।

अर्कोतर्फ, गेट्स फाउन्डेशनले विश्वभर स्वास्थ्य, शिक्षा र प्रविधिमा पुर्याउँदै आएको योगदान सर्वविदित छ। पीएए-२०२५ सम्मेलनमा गेट्स पनि एक प्रमुख वक्ताका रूपमा सहभागी भएका थिए। सम्मेलनले विश्वभरका नेताहरू, परोपकारी व्यक्तिहरू र नीति निर्माताहरूको सहभागिता गराएको थियो।