धुलिखेल अस्पताल ट्रमा तथा आपतकालीन केन्द्र सुधारका लागि ५३ करोड ६२ लाख अनुदानको सम्झौता
काठमाडौं, २ जेष्ठ । धुलिखेल अस्पताल ट्रमा तथा आपतकालीन केन्द्र सुधार परियोजनाका लागि जापानले ५७ करोड ३० लाख येन थप अनुदान दिने सहमति पत्रमा नेपाल र जापानबीच हस्ताक्षर भएको छ।
शुक्रबारको विनिमय दर अनुसार १० जापानी ऐनको नेपाली खरिददर ९ रूपैयाँ २६ पैसा छ। जस अनुसार ५७ करोड ३० लाख येन नेपाली रूपैयाँ ५३ करोड ६२ लाख रूपैयाँ हुन्छ।
अर्थ मन्त्रालयका सचिव घनश्याम उपाध्याय र नेपालका लागि जापानका राजदूत माएडा तोरुले सहमति पत्रमा हस्ताक्षर गरेका हुन्।
उपप्रधानमन्त्री एवं अर्थमन्त्री विष्णुप्रसाद पौडेल र जापानका परराष्ट्र मामिलाका उपमन्त्री इकुइना अकिकोको उपस्थितिमा सहमति पत्रमा हस्ताक्षर भएको हो।
यसअघि सन् २०२३ अक्टोबरमा जापान सरकारसँग यो परियोजनाको कार्यान्वयनका लागि ३ अर्ब २९ करोड ६० लाख येन अनुदान दिने सम्झौता भएको थियो।
सहमति पत्रमा हस्ताक्षर लगत्तै अर्थमन्त्री पौडेल र जापानका परराष्ट्र मामिलाका उपमन्त्री अकिकोबीच छुट्टै भेटवार्ता भएको थियो।
