वीरेन्द्र बस्नेतसहित नयाँ दल ‘गतिशील लोकतान्त्रिक पार्टी’ दर्ता

‘सबै मिलौं, देश बचाऊँ, देश बनाऊँ’ भन्ने नाराका साथ अघि बढेको पार्टीले विगतका राजनीतिक दलहरूप्रति जनस्तरमा बढ्दो असन्तुष्टिलाई सम्बोधन गर्ने दाबी गरेको छ।

पेशावाद र पारदर्शितामा प्रतिबद्धता

पार्टीले जेन जेड आन्दोलनले देखाएको जनशक्ति र असन्तोषलाई सम्हाल्न असफल वर्तमान राजनीतिलाई वैकल्पिक दिशा दिन उदेश्य राखेको जनाएको छ। यसले राजनीतिलाई पेशा बनाउने प्रवृत्ति अन्त्य गर्दै, नागरिक–केन्द्रित, पारदर्शी र जवाफदेही शासन प्रणालीको खाका अघि सारेको छ।

पार्टीको घोषणापत्र अनुसार:

पुराना दलहरूको भ्रष्टाचार, सत्ता स्वार्थ र पहुँच आधारित संरचना अन्त्य गर्ने।
संघीय स्तरमा महासचिव र प्रदेश तथा पालिकामा सचिवको नियुक्ति।
एक व्यक्ति एक पद, दुई कार्यकाल मात्र रहने नियम।
सार्वजनिक पद र पार्टी पदमा फरक व्यक्ति रहने व्यवस्था।
पार्टी आम्दानी र खर्च अनलाइन, र प्रत्येक गतिविधिमा डिजिटल पारदर्शिता।
२०% भन्दा कम मत पाएमा सरकारमा सहभागी नहुने स्पष्ट अडान।

विधिको शासन र उद्यमशीलताको सम्मान

पार्टीले विधिको शासनलाई लोकतन्त्रको मेरुदण्ड ठानेको छ र सबै नागरिक, राजनीतिक नेता, कर्मचारी, व्यापारी र उच्चपदस्थका लागि समान रूपमा लागू हुने बताएको छ।

त्यस्तै, उद्यमशीलता र निजी क्षेत्रलाई अर्थतन्त्रका खम्बा मान्दै, स्व-रोजगार सिर्जना गर्ने, कर तिर्ने र राष्ट्र निर्माणमा योगदान गर्ने उद्यमीहरूको सम्मान र संरक्षण गर्ने प्रतिबद्धता जनाएको छ।

पार्टीले आगामी चुनावमा विरोधको राजनीति र पेशागत स्वार्थले देशलाई गहिरो अन्धकारमा पुर्याउन सक्ने सम्भावना औंल्याउँदै, अबको राजनीति सोचयुक्त, सिर्जनशील, ईमानदारीमा आधारित र त्यागपूर्ण हुनुपर्नेमा जोड दिएको छ।

साथै, गतिशील लोकतान्त्रिक पार्टीले समावेशी र समतामूलक उज्यालो भविष्य सुनिश्चित गर्ने आफ्नो प्रतिबद्धता दोहोर्याउँदै, विकल्प खोजिरहेका मतदातालाई आकर्षित गर्न तयार रहेको बताएको छ।