राष्ट्रिय सभा अध्यक्ष दाहालको जेनेभामा बहुपक्षीय भेटघाट
काठमाडाैं, ७ कार्तिक । राष्ट्रिय सभा अध्यक्ष नारायण प्रसाद दाहालले जेनेभामा अन्तर–संसदीय संघ (IPU) को १५१औँ महासभामा भाग लिँदै अस्ट्रेलियाली संसद प्रतिनिधि सभा स्पीकर मिल्टन डिकसँग द्विपक्षीय बैठक गरेका छन्।
बैठकमा दाहाल र डिकले आपसी सम्बन्ध, द्विपक्षीय हित, सहयोग र संसदीय सहकार्यबारे छलफल गरे। दाहालले अस्ट्रेलियाले नेपालको शिक्षा, स्वास्थ्य, सुशासन र सामुदायिक वन व्यवस्थापनमा दिएको योगदानको सराहना गर्दै भविष्यमा जलवायु परिवर्तन, नवीकरणीय ऊर्जा र स्थानीय सुशासनजस्ता क्षेत्रमा सहयोग विस्तार हुनेमा विश्वास व्यक्त गरे।
उनले उल्लेख गरे कि अस्ट्रेलियामा १ लाख ८० हजारभन्दा बढी नेपाली बसोबास गर्छन्, जसमा ६० हजारभन्दा बढी विद्यार्थी अध्ययनरत छन्। दाहालले नेपाली समुदाय र विद्यार्थीहरूको सुरक्षित वातावरणका लागि अस्ट्रेलियाली पक्षलाई धन्यवाद दिँदै शैक्षिक साझेदारी, प्राविधिक तालिम र अनुसन्धान आदान–प्रदानमा सहयोग विस्तार गर्न अनुरोध गरे।
यसैगरी, दाहालले भारतीय संसदीय प्रतिनिधिमण्डलका प्रमुख अनुराग सिंह ठाकुरसँग पनि भेट गरी नेपाल–भारत सम्बन्ध बलियो रहेको उल्लेख गरे। उनले नेपालमा हालैको जेन–जेड आन्दोलन, अन्तरिम सरकारको गठन र निर्वाचन घोषणा बारे जानकारी दिँदै, लोकतान्त्रिक संस्थाहरू सुदृढ गर्न समयमै निर्वाचन सञ्चालनमा नेपाल प्रतिबद्ध रहेको बताए। साथै, क्षतिग्रस्त संरचनाको पुनर्निर्माण र आगामी निर्वाचनमा मित्र राष्ट्रहरूको सहयोगको माग गरे।
अन्ततः IPU महासचिव मार्टिन चुंगोङसँग भेटका क्रममा दाहालले नेपालको राजनीतिक परिस्थितिमा आएको परिवर्तन, प्रतिनिधि सभा निर्वाचन तालिका र राष्ट्रिय सभाको विधायी भूमिकाबारे जानकारी गराए। उनले संसदीय अभ्यास सुधार र लोकतान्त्रिक संस्थाहरू सुदृढ पार्न IPU सँग सहकार्यको इच्छा व्यक्त गरे।
