विश्व ब्यांकद्वारा उर्जा क्षेत्र पोलीसी क्रेडीट स्वीकृत, १० करोड डलर बजेटरी सहयोग
काठमाडौं, ३ असोज । विश्व ब्यांकले १० करोड अमेरिकी डलरको उर्जा क्षेत्रको पहिलो पोलीसी क्रेडीट स्वीकृत गरेको छ । नीतिगत सुधारका आधारमा यसअघि वित्तिय क्षेत्र सुधार र सार्वजनिक वित्त सुधारका आधारमा पनि विश्व ब्यांकले बजेटरी सहयोग दिदैं आएको छ । बजेटरी सहयोग अन्तर्गत प्राप्त सहयोगलाई सरकारले आफ्नो विकास प्राथमिकता अनुसार खर्च गर्न पाउँछ ।
नेपालको उर्जा क्षेत्रमा लगानी तथा सञ्चालनमार्फत् विश्वसनीय, सबैको पहुँच र दिगो उर्जा आपूर्तिमा सहयोग गर्ने उद्देश्यले विश्व ब्यांकले यो सहयोग दिएको हो । यो सहयोगले नेपालमा आधारभूत नीति, नियमन र संरचनागत मापदण्डहरु निर्माणका क्षेत्रमा काम गरिनेछ । नेपाल विद्युत् प्राधिकरण एकमात्र विद्युत् खरिदकर्ता रहेको नेपालमा पारदर्शी, जवाफदेही र स्वचालित र विद्युत् व्यापारलाई समेत प्रवद्र्धन गर्ने नियामकीय निकायको स्थापनाका लागि विश्व बैंकले यो सहयोग उपलब्ध गराएको हो ।
नेपालमा ठूलो मात्रामा जलविद्युत् उत्पादनका सम्भावना भएपनि कुल उर्जा खपत्मा ५ प्रतिशत मात्र जलविद्युत्को योगदान छ । ९५ प्रतिशत उर्जाको आपूर्ति अफ ग्रीड र उर्जाका अन्य स्रोतमार्फत् हुने गरेको छ । नेपालमा प्रतिव्यक्ति उर्जा खपत १७७ युनिट प्रतिवर्ष रहेको छ । जुन दक्षिण एसियामा पाँचौ हो ।
