आँखुखोला हाइड्रोपावरको आइपीओ बाँडफाँड, सबैले पाए १० कित्ता, अधिकतम २० कित्ता
काठमाडौं, ११ कात्तिक । आँखुखोला हाइड्रोपावर कम्पनीको आइपीओ आज बाँडफाँट भएको छ । बिक्री प्रबन्धक सिभिल क्यापिटलको कार्यालय सीटीसी मल सुन्धारामा एक कार्यक्रमबीच आइपीओ बाँडफाँट गरिएको हो । यस आइपीओमा ८३ हजार ३१६ जना आवेदकले १० कित्ताका दरले ८ लाख ३३ हजार १६० कित्ता सेयर हात पारेका छन् ।
त्यसपछि फेरि बाँकी रहेको ४ लाख ७४ हजार कित्ता सेयर पुनः १० कित्ताका दरले बाँडफाँट गरिएको छ । जस अनुसार ४७ हजार ४०० जना आवेदकले २० कित्ताका दरले आइपीओ पाएका छन्। न्यूनतम १० कित्ता सबैलाई र अधिकतम पाउनेले २० कित्तासम्म सेयर पाएका हुन् । कुल ३५ हजार ९१६ जनाले १० कित्ता सेयर पाएका हुन् ।
यता, कर्मचारीका लागि छुट्याइएको २७ हजार ५२० कित्ता सेयरमा भने जम्मा ५ जना कर्मचारीले ५९ कित्ताका लागि मात्र आवेदन दिएका छन् । कर्मचारीलाई छुट्याएर बाँकी रहेको २७ हजार ४६१ कित्ता पनि सर्वसाधारणलाई बाँडिएको हो । आइपीओमा ६१ जना आवेदकको आवेदन रद्द भएको छ ।
यस आइपीओमा माग भन्दा ४.४३ गुणा बढी हो । आँखुखोलाले असोज २३ गतेदेखि २६ गतेसम्म सर्वसाधारणका लागि १०० रुपैयाँ दरमा १३ लाख ७६ हजार २० कित्ता आइपीओ बिक्रीमा ल्याएको थियो । आँखुखोलाले यसअघि आयोजना प्रभावित धादिङ जिल्लाका स्थानीयलाई निष्कासन गर्दा बिक्री नभएको १ लाख ७६ हजार २० कित्ता समेत जोडेर आइपीओ निष्कासन गरेको हो । कम्पनीले धादिङ जिल्लाबासीका लागि ८ लाख कित्ता आइपीओ बिक्री खुला गर्दा ६ लाख २३ हजार ९८० कित्ता सेयरमा मात्र आवेदन परेको थियो । आँखुखोलाले जारी पुँजीको १५५ आइपीओ सर्वसाधारणलाई बिक्री खुला गरेको हो ।
आइपीओ बिक्रीपछि कम्पनीको चुक्ता पुँजी ८० करोड रुपैयाँ पुग्नेछ । यसअघि आँखुखोलाले गत साउन १७ गतेदेखि भदौ १५ गतेसम्म धादिङ जिल्लाबासीका लागि ८ लाख कित्ता आइपीओ बेचेको थियो । क्रेडिट रेटिङ एजेन्सी इक्रा नेपालले पनि आँखुखोलाको आइपीओलाई ग्रेड ५ रेटिङ दिएको छ । कम्पनीले आँखुखोलाको पानीबाट ८.४ मेगावाट जलविद्युत उत्पादन गर्ने उदेश्य अनुरुप २०७० साल भदौ ८ गतेदेखि व्यावसायिक उत्पादन सुरु गरेको हो । कम्पनीको विद्युत उत्पादन केन्द्र धादिङको त्रिपुरासुन्दरी गाउँपालिकामा रहेको छ । रजिष्ट्रार कार्यालय भने काठमाडौं नक्सालमा छ ।
