अनलाईन कारोबारको सकारात्मक प्रभाव देखिएन सेयर बजारमा, सोमबार पनि दोहोरो अंकको गिरावट
काठमाडौं, २६ कात्तिक । पछिल्लो समय क्रमश ओरालो लागेको सेयर बजार सोमबार पनि दोहोरो अंकले घटेको छ । कारोबार सुरु भएदेखि नै घट्न थालेको बजार १३.०३ अंकले घटेर ११९२.७५ को बिन्दुमा बन्द भयो ।
सोमबार फाइनान्स समूहको परिसूचक ०.४२ अंकले बढेपनि बाँकी सबै समूहको परिसूचक ओरालो लागेको छ । सबैभन्दा धेरै नीर्जिवन बीमा समूहको परिसूचक १०१.६१ अंकले तल झरेको छ । त्यस्तै जिवनबीमा समूहको परिसूचक पनि ९१.९१ अंक, माइक्रोफाइनन्स २२.९८ अंक, हाइड्रोपावर १८.७४ अंक र होटल समूहको परिसूचक ११.२१ अंकले तल झरेको छ ।
१ सय ३१ कम्पनीको १३ करोड ३७ लाख रुपैयाँ बराबरको सेयर कारोबार भएकोमा सबैभन्दा धेरै प्रभु बैंकको सेयर कारोबार भएको छ । त्यस्तै सो दिन सबैभन्दा धेरै कमाउने कम्पनीहरुको अग्रस्थानमा नविल इक्युटी फन्ड रहेको छ भने सबैभन्दा धेरै गुमाउने कम्पनीहरुको सूचीको अग्रस्थानमा अपी पावर कम्पनी लिमिटेड रहेको छ ।
पछिल्लो समय नेपाल स्टक एक्सचेञ्ज (नेप्से) ले सेयर बजारलाई थप विस्तारित गर्ने र लागनीकर्तालाई सहजता प्रदान गर्ने उद्धेश्यले अनलाईन कारोबार संचालन गरेपछि बजार सकारात्मक बाटोमा अगाडी बढ्ने आमलगानीकर्ताको अपेक्षा थियो । तर अनलाइन कारोबार संचालनको दिन केही सकारात्मक देखिएको बजार त्यसपछिका दिनमा भने पुन पुरानै गतिमा ओरालो लागिरहेको छ ।
