बजेट खर्चको अवस्था बुझ्न अर्थ समितिले सरकारलाई डाक्यो, राजस्व असुली जति पनि छैन खर्च

काठमाडौं । अर्थ समितिले सरकारको खर्चको अवस्था बुझ्न अर्थमन्त्री, सचिवहरु तथा महालेखा नियन्त्रकलाई बोलाएको छ । अहिले अर्थ समितिको बैठक चलिरहेको छ । पहिलो चौमासिकमा सरकारको खर्चको अवस्था निराशाजनक रहेको छ । सरकारले राजस्व उठाएजति पनि खर्च गर्न सकेको छैन । डा. युवराज खतिवडाले ल्याएको यस आर्थिक वर्षको बजेटले प्रदेश र स्थानीय तहमा जाने सशर्त बाहेकका अनुदान पहिलो किस्तामा ४० प्रतिशत दिएपछि हरेक त्रैमासमा खर्चको आधारमा दिने गरी कडाइँ गरेका छन् । तल्लो तहका सरकारले पनि खर्च गर्न नसकेकाले अनुदान पठाउनुपर्ने दबाब केन्द्र सरकारलाई छैन । फलस्वरुप सरकार बजेट सरप्लसमा छ ।
यो अवधिमा सरकारले २८६ अर्ब ४५ करोड रुपैँया राजस्व संकलन गरेको छ । तर कुल बजेट खर्च भने २४४ अर्ब ७७ करोड रुपैँया रहेको छ । पहिलो चौमासिकमा सरकारले कुल बजेटको झण्डै १८ प्रतिशतमात्र खर्च गरेको छ । तर राजस्व भने वार्षिक लक्ष्यको ३० प्रतिशत उठाइसकेको छ । समीक्षा अवधिमा पुँजीगत खर्च ८.३ प्रतिशत र चालु खर्चतर्फ भने विनियोजित बजेटको २४ प्रतिशत खर्च भइसकेको छ ।