सिक्टा सिँचाइ आयोजनामा आठ अर्ब बढीको आर्थिक अनियमितता, पूर्वमन्त्री पाण्डेसहित २१ जनाविरुद्ध भ्रष्टाचारको मुद्दा
काठमाडौं, २२ मंसिर । प्रदेश नम्बर ५ को बाँकेमा निर्माणाधीन सिक्टा सिँचाइ आयोजनामा आठ अर्ब बढीको आर्थिक अनियमितता गरेको भन्दै राप्रपा नेता एव पूर्वमन्त्री समेत रहेकका कालिका कन्सट्रकसनका मालिक विक्रम पाण्डेसहित २१ जनाविरुद्ध भ्रष्टाचारको मुद्दा दायर भएको छ । आयोजनामा आर्थिक अनियमितता गरेको अभियोगमा अख्तियार दुरुपयोग अनुसन्धान आयोगले विशेष अदालतमा पूर्वमन्त्री विक्रम पाण्डेसहित २१ जनाविरुद्ध मुद्दा दर्ता गरेको हो । आयोजना निर्माण गर्ने जिम्मा पाएको सिटिसिई कालिका कन्स्ट्रक्सन कम्पनीले उक्त आयोजनामा ८ अर्ब ५९ करोड ८८ लाख रुपैयाँबराबरको आर्थिक अनियमितता गरेको ठहर गर्दै मुद्दा चलाएको हो।
आयोगको आरोपपत्रमा सिक्टाको मूल नहर भत्किएको, डिजाइनमा त्रुटि भएको तथा निर्माण क्रममा खटिएका प्राविधिक, कन्सल्टेन्ट र निर्माण व्यवसायीले सुपरभिजन नगर्दा गुणस्तरीय काम हुन नसकेको उल्लेख छ। नहर भत्कँदासमेत आयोजनाका कर्मचारीले निर्माण व्यवसायीलाई उन्मुक्ति दिएको अनुसन्धानको क्रमबाट खुलेको आयोगले जनाएको छ ।
आरोपितहरु
आयोगले मुद्दा दायर गरेका आयोजना पूर्व प्रमुखहरूमा सर्वदेवप्रसाद जैसवाल, दिलीपबहादुर कार्की र सरोजचन्द्र पण्डित छन्। पण्डित हाल सिँचाइ विभागका महानिर्देशक छन्। अन्य आरोपीमा आयोजनाका पूर्व र वहालवाला कर्मचारी १६ जना तथा ठेकेदार/प्रतिनिधि र परामर्शदातासँग सम्बन्धित ५ जना छन्।
ठेकेदार कम्पनी सिटिसिई कालिका कन्स्ट्रक्सन कम्पनीका प्रमुख पाण्डे र मूल नहर भत्कने बेला आयोजना प्रमुख रहेका बस्नेतबाट जनही २ अर्ब १३ करोड ७६ लाख ७९ हजार ९ सय २० रुपैयाँ बिगो असुल्नुपर्ने दाबी आरोपपत्रमा लिइएको छ।
बाँकेको अगैयामा बाँध निर्माण गरी राप्ती नदीको ५० क्युमेक्स पानी अटाउने गरी बनाइएको मूल नहर ४/५ क्युमेक्स पानी पठाउँदा नै भत्कन थालेपछि आर्थिक अनियमितताको भएको आंशका साहित अख्तियारले छानविन सुरु गरेको थियो ।
