आज मध्यरातिबाट सवारी साधन संचालनमा रोक, गृहमन्त्रालयले भन्यो–१२ बजे सम्म गन्तव्यमा पुग्नु
काठमाडौं, २० मंसिर । दोश्रो चरण अन्तर्गतको प्रतिनिधि तथा प्रदेश सभाको निर्वाचन हुने जिल्लाहरूमा आज मध्यरातिबाट सवारी साधन सञ्चालनमा रोक लगाइने भएको छ । गृह मन्त्रालयका अनुसार भोली बिहान ७ बजे मतदान सुरु हुने भएपनि आज मध्यरातिदेखि स्थानीय प्रशासनले सवारी साधन सञ्चालनमा रोक लगाइने छ ।
आज मध्य रातीदेखि निजी तथा सार्वजनिक सवारी साधन सञ्चालन गर्न नपाउने भएपनि आयोगबाट पास लिएका र अत्यावश्यक सेवाका साधन भने चल्न दिइने मन्त्रालयले बताएको छ । भोली साँझ मतदानपछि पनि मतपेटिका सुरक्षित रूपमा केन्द्रमा पुर्याउने सहितका काम बाँकी रहने हुँदा भोली साँझ ७ बजेसम्म सवारी साधन सञ्चालन गर्न नपाइने गृह मन्त्रालयले जनाएको छ ।
आज राति १२ बजे अगावै गन्तव्यमा पुग्ने व्यवस्था मिलाउन पनि गृह मन्त्रालयले यात्रुहरुलाई भनेको छ ।
