१६ वटा वाणिज्य बैंकको वित्तीय विवरण सार्वजनिक, सबैभन्दा बढी नाफा कमाउनेमा नबिल

काठमाडौं, १९  माघ । केही दिन दिनयताबाट वाणिज्य बैंक तथा अन्य कम्पनीले धमाधम आफ्नो वित्तीय विवरण सार्वजनिक गरिरहेका छन् । हाल सम्म १६ वटा वाणिज्य बैंकले दोस्रो त्रैमासको वित्तीय विवरण सार्वजनिक गरेका छन् । वित्तीय विवरण सार्वजनिक गर्ने बैंकमध्ये सबैभन्दा बढी नाफा नबिल बैंकले कमाएको देखिन्छ । यस बैंकले २ अर्ब १७ करोड ६८ लाख रूपैयाँ नाफा कमाएको छ । यो नाफा गत वर्षको सोही अवधिको तुलनामा १८ दशमलव ४५ प्रतिशतले बढी हो ।  अघिल्लो वर्ष बैंकले १ अर्ब ८३ करोड ७७ लाख नाफा काएको थियो । त्यसैगरी, कुमारी बैंकले सबैभन्दा कम नाफा कमाएको छ । यस बैंकले ६७ करोड ६२ लाख रूपैयाँ कमाएको हो । बैंकले गत वर्षको तुलनामा ३२ दशमलव २३ प्रतिशतले नाफा बढाएको छ । त्यसैगरी, एनआईसी एसिया बैंकले १ अर्ब ५१ करोड १४ लाख रूपैयाँ, एभरेस्ट बैंकले १ अर्ब ४२ करोड ९९ लाख रूपैयाँ नाफा कमाएका छन् ।

त्यसैगरी, ग्लोबल आईएमई बैंकले १ अर्ब २२ करोड ९१ लाख रूपैयाँ, एनएमबी बैंकले १ अर्ब १० करोड ९९ लाख रूपैयाँ नाफा कमाएका छन् । त्यस्तै, सिद्धार्थ बैंकले १ अर्ब ४ करोड १५ लाख र नेपाल एसबीआई बैंकले १ अर्ब २ करोड २७ लाख रूपैयाँ नाफा कमाएका छन् ।

दोस्रो त्रैमासिकमा १६ वटा वाणिज्य बैंकले कुल १६ खर्ब ७१ अर्ब ३७ करोड ६१ लाख रूपैयाँ निक्षेप संकलन गरेका छन् । यस अवधिमा बैंकहरूले १४ खर्ब ९७ अर्ब ९७ करोड २५ लाख रूपैयाँ कर्जा प्रवाह गरेको बैंकहरूको वित्तीय विवरणले देखाएको छ । निक्षेप तथा कर्जामा सबैभन्दा अगाडि एनआईसी एसिया बैंक रहेको छ । यस बैंकले १ खर्ब ७५ अर्ब ७६ करोड रूपैयाँ निक्षेप संकलन गरेको छ भने १ खर्ब ४९ अर्ब ३० करोड रूपैयाँ कर्जा लगानी गरेको छ ।

त्यसैगरी, वित्तीय विवरण प्रकाशित गरेका १६ वटा बैंकमध्ये कुमारी बैंकको मात्रै ८ अर्ब रूपैयाँ चुक्ता पुँजी पुगेको छैन । यस बैंकको चुक्ता पुँजी ७ अर्ब १६ करोड रूपैयाँ छ । बैंकले हालै गत आर्थिक वर्षको मुनाफाबाट ८ दशमलव ५० प्रतिशत बोनस सेयर वितरण गर्ने प्रस्ताव गरेको छ । बोनस सेयर बाँडेपछि बैंकको चुक्ता पुँजी ८ अर्ब पुग्ने बैंकले जनाएको छ ।।

Leave a Reply

Your email address will not be published. Required fields are marked *