वित्तिय संस्थाले शतप्रतिशत कर्जाको सुरक्षण गराएनन्, दोस्रो त्रैमासमा १४ अर्व ६४ करोडको मात्र सुरक्षण

काठमाडौं, ५ फागुन । निक्षेप तथा कर्जा सुरक्षण कोषले चालु आर्थिक बर्षको दोस्रो त्रैमासमा १४ अर्ब ६४ करोड रुपैयाँको कर्जा सुरक्षण गरेको छ । कोषमा गरिएको सो कर्जा सुरक्षण गत बर्षको सोहि अवधीको तुलनामा ६६.४४ प्रतिशतले बढी हो ।

गत आर्थिक बर्षको दोस्रो त्रैमासमा कोषले ९ अर्ब ७३ करोड रुपैयाँको कर्जा सुरक्षण गरेको थियो । तर कोषले चालु आर्थिक बर्षको दोस्रो त्रैमासमा लक्ष्य अनुसारको कर्जा सुरक्षण नभएको जनाएको छ । कोषले यो अवधीमा १५ अर्ब रुपैयाँको कर्जा सुरक्षण गराउने लक्ष्य राखेको थियो ।

सर्वसाधारणको निक्षेप र कर्जाको संरक्षण गरि मुलुकको आर्थिक विकासको निमित्त बैंकिङ्ग तथा वित्तीय प्रणालीप्रतिको विश्वासनीयता अभिबृद्धि गर्न तथा सर्वसाधारणको आर्थिक हित संरक्षणका कोषले काम गर्ने गर्छ ।

कोषले गत बर्षको तुलनामा ६६ प्रतिशत भन्दा बढी कर्जा सुरक्षण गरेको भएता पनि सबै बैंक तथा वित्तिय संस्थाहरुले शतप्रतिशत कर्जा सुरक्षण नगराएको कोषका प्रमुख कार्यकारी अधिकृत बिष्णुबाबु मिश्रले बताए ।

यसैगरि कोषले चालु आथिक वर्षको दोस्रो त्रैमासमा २ लाख ७९ हजार दुई सय ४० वटा कर्जा सुरक्षण गरेको छ । गएको आर्थिक बर्षको सोही अवधीमा एक लाख ७३ हजार सात सय १२ वटा कर्जाको सुरक्षण भएको थियो । कोषले हाल कृषि कर्जा, लघु तथा विपन्न वर्ग कर्जा, साना तथा मझौला कर्जा र पशुधन कर्जाको सुरक्षण गर्दै आएको छ । जसमध्ये पुस मसान्त सम्ममा सबै भन्दा धेरै लघु तथा विपन्न वर्ग कर्जा ११ अर्ब ८४ करोड १३ लाख रुपैयाको कर्जा सुरक्षण गरेको
छ । यस्तै कृषि कर्जा १ अर्ब ५२ करोड ९९ लाख रुपैयाँ, साना तथा मझौला उद्यम कर्जाको ९७ करोड ७९ लाख रुपैयाँ र पशुधन तर्फको २० करोड ८० लाख रुपैयाँ कर्जाको सुरक्षण कोषले गरेको जनाइएको छ ।

सरकार तथा नियमनकारी निकाय नेपाल राष्ट्र बैंकले सबै प्रकारका कर्जाको सुरक्षण गर्न बैंक तथा वित्तिय संस्थाहरुलाई निर्देशन दिएको भएता पनि त्यसको कार्यान्वयन पुर्णरुपमा नभएको प्रमुख कार्यकारी अधिकृत मिश्रको गुनासो छ । केहि महिना अगाडि राष्ट्र बैंकले परिपत्र जारी गर्दै सबै बैंक तथा वित्तिय संस्थाहरुले कर्जा सम्बन्धी सबै सुचना कर्जा सुचना केन्द्रमा उपलब्ध गराउनु पर्ने र सो अनुसार कर्जा तथा निक्षेप सुरक्षण कोषमा सुरक्षण गर्न निर्देशन पनि दिएको थियो । तर सबै बैंकले सो निर्देशन अवलम्वन गरेका छैनन भन्ने मिश्रको भनाईले पनि प्रष्ट पार्छ ।

बाणिज्य बैंकहरुले प्रवाह गर्ने २ करोड रुपैयाँ भन्दा माथिको जुनसुकै कर्जा पनि कोषमा सुरक्षण गराउनु पर्ने राष्ट्र बैंकको निर्देशनमा छ । यसका साथै अन्य बैंक तथा वित्तिय संस्थाहरुले प्रवाह गर्ने कृषि कर्जा २ करोड रुपैयाँ भन्दा माथि, लघु कर्जा, साना तथा मझौला कर्जा, पशुधन कर्जा १५ लाख रुपैयाँ भन्दा माथिको कर्जाको सुरक्षण कोषमा गराउनु पर्ने छ ।