सैनिकका छोरोछोरीलाई प्राविधिक विषय अध्ययन गर्न प्रभु बैंकले सहुलियत कर्जा दिने
काठमाडौं, २५ चैत । प्रभु बैंकले नेपाली सेना छोराछोरीलाई प्राविधिक शिक्षा अध्ययनका लागि सहुलियत कर्जा सुविधा दिने भएको छ। जंगी अड्डामा आयोजित एक कार्यक्रमबीच प्रधानसेनापति पूर्णचन्द्र थापा र प्रभु बैंक लिमिटेडका प्रमुख कार्यकारी अधिकृत अशोक शेरचनले उक्त सुविधा दिनेबारे समझदारी पत्रमा हस्ताक्षर गरेका हुन ।
सम्झौता अनुसार सैनिक कल्याणकारी कोषको सिफारिसमा बहालवाला तथा अवकास प्राप्त सकल दर्जाका सैनिकहरुका छोरा छोरीहरुलाई स्वदेश तथा विदेशमा चिकित्साशास्त्र, ईन्जिनियरिङ्ग, सूचना प्रविधि, कृषि र पशु विज्ञान तथा वन विज्ञान संकायमा पढ्न जानेहरुलाई बैंकले सहुलियत कर्जा दिने छ । स्नातक वा सो भन्दा माथिल्लो तहको शिक्षा हाँसिल गर्नका लागि प्रभु बैंकले आवश्यक प्रक्रिया पूरा गरी शैक्षिक कर्जा सुविधा उपलब्ध गराउने जानकारी दिएको छ । शैक्षिक कर्जा सुविधा रकम सहुलियत ब्याजदरमा अधिकतम २५ लाख रुपैयाँसम्म हुने बैंकले जनाएको छ ।
बैंकको केन्द्रीय कार्यालय सहित अन्य सबै शाखा कार्यालयबाट उक्त सुविधा लिन सकिने जनाइएको छ।
