ग्यास उद्योगीको कमिशन रकम आज देखि बढ्यो तर असन्तुष्टि कायमै
काठमाडौं, १२ बैशाख । ग्यास उद्योगीको बृद्धि गरिएको कमिशन आज देखि कार्यान्वयनमा आउने भएको छ। नेपाल आयल निगमले गत चैत २२ मा ग्यास उद्योगीको कमिशन प्रतिसिलिन्डर २ सय ३६ रुपैयाँबाट बढाएर २ सय ६३ रुपैयाँ ८९ पैसा पु¥याउने निर्णय गरेको थियो । भारतको बरौनीस्थित डिपोबाट काठमाडौंसम्म ग्यास ढुवानी बापत उक्त रकम सरकारले बेहोर्ने गरेको छ ।
निगमको निर्णय अनुसार ढुवानी खर्चमा प्रतिसिलिन्डर २७ रुपैयाँ ८९ पैसा बढेको छ । व्यवसायीको आन्दोलनका कारण ग्यास आयात र विक्री ठप्प हुने भएपछि बाध्य भएर ढुवानी खर्च बढाउनु परेको निगमले जनाएको छ।
यसअघि उद्योग, वाणिज्य तथा आपूर्ति मन्त्रालयको निर्देशनमा निगमले त्यसबारे अध्ययन गरी सुझाव दिन एक कार्यदल बनाएको थियो । सोही कार्यदलको सुझाव अनुसार उपभोक्तालाई पनि भार नपर्ने गरी कमिशन तथा लागत खर्च बढाइएको बताइएको छ ।
यो निर्णय अनुसार ग्यास उद्योगीले वार्षिक ९६ करोड रुपैयाँ कमिशन पाउछन् । ग्यास उद्योगीहरू भने उक्त निर्णयबाट सन्तुष्ट देखिदैनन । एलपी ग्यास उद्योग संघका अध्यक्ष गोकुल भण्डारीले २७ रुपैयाँ ८९ पैसा कमिशन बढाएर सरकारले गैरजिम्मेवार व्यवहार प्रदर्शन गरेको बताए । ग्यास ढुवानीमा प्रतिसिलिन्डर १ सय रुपैयाँ घाटा खाएर उद्योग सञ्चालन गर्नु परिरहेको उनको दाबी छ ।
