आर्थिक वर्षको अन्तिम दिन सेयर बजार ४.४५ अंकले बढ्यो
काठमाडौं, ३१ असार । आर्थिक वर्ष २०७५÷७६ को अन्तिम दिन आज सेयर बजार ४.४५ अंकले बढेको छ । नयाँ आर्थिक वर्षको सुरुवात हुनै लाग्दा सेयर बजारमा सुधारको संकेत देखिएको हो । यो साताको आईतबार, सोमबार र मंगलबार (आज) को सेयर कारोबारमा निरन्तर सुधार देखिएको छ ।
आज नेप्सेमा सूचिकृत ११ वटै समूहको उपसूचकमा बृद्धि भएको छ । सबैभन्दा बढी उपसूचक बृद्धि हुनेमा होटेल समूह रहेको छ । होटेल समूहको ५६.०८ अंकले उपसूचक बृद्धि भएको छ ।
त्यस्तै १ सय ६१ कम्पनीको १९ लाख ५६ हजार ६ सय ३० कित्ता सेयर खरिद–विक्री हुँदा ३४ करोड ७२ लाख रुपैयाँभन्दा बढीको कारोबार भएको छ ।
सबैभन्दा बढी सेयर कारोबार ५ करोड ७८ लाख रुपैयाँभन्दा बढी नेपाल बैंक लिमिटेडको भएको छ ।