प्रभु बैंकमा विदेशी मुद्रा साट्न ‘प्रभु ईजी फरएक्स’ मोवाईल एपको प्रयोग गर्न सकिने
काठमाडौं, ६ साउन । प्रभु बैंक लिमिटेडले बैदेशिक मुद्रा सटही सुविधालाई मोवाइलमार्फत् अनलाइन आवेदन गर्न सकिने एप्लीकेसन ‘प्रभु ईजी फरएक्स’ सञ्चालनमा ल्याएको छ । बैंकसम्म पुगेर सटहीको आवेदन गरी बैदेशिक मुद्रा लिनु पर्ने बाध्यतालार्ई सहजता प्रदान गर्न उक्त एप्लीकेसनको सुरुवात गरिएको बैंकले जनाएको छ ।
यो एप्लीकेसन एन्ड्रोएड मोवाइलको ‘प्ले स्टोर’बाट सजिलै डाउनलोड गर्न सकिनेछ भने एप्पल स्टोरमा पनि चाँडै उपलब्ध हुने बैंकले जनाएको छ । उक्त एप्लीकेसनमार्फत् बैदेशिक मुद्रा सटहीको लागि अनलाइन आवेदन गर्न सकिने बैंकद्वारा जारी प्रेस विज्ञप्तिमा उल्लेख छ ।
आवेदकलाई बैंकवाट केही समय भित्रमै एसएमएसमार्फत् सटहीको कन्फर्मेसन कोड प्रदान गरिने बैंकले जनाएको छ । कन्फर्मेसन कोड उपलब्ध पश्चात बैंकले तोकेको शाखा वा काउन्टरमा गएर आवेदकले बिदेशी मुद्रा सटही गर्न सक्ने छ । त्रिभुवन अन्तराष्ट्रिय बिमानस्थलमा रहेको बैंकको काउण्टरबाट समेत यो सुविधा उपलब्ध हुने व्यवस्था गरिएको बैंकले जनाएको छ ।
