सामाजिक सुरक्षा योजनामा आवद्ध हुनु ऐच्छिक हैन अनिवार्य होः श्रम मन्त्री गोकर्ण विष्ट

काठमाडौं, ८ भदौ । श्रम, रोजगार तथा सामाजिक सुरक्षा मन्त्री गोकर्ण विष्टले संगठित संघ संस्था र निजी क्षेत्रका रोजगारदाताहरु सामाजिक सुरक्षा योजनामा अनिवार्य आवद्ध हुनुपर्नेमा जोड दिएका छन् । यो योजनाले रोजगारदाताहरुमा केही आर्थिक भार थपिएपनि श्रमिक प्रतिको सम्पूर्ण दायित्व सरकारले बहन गर्ने भन्दै यसको फाईदा लिन रोजगारदाताहरुलाई आग्रह गरेका हुन् ।

सामाजिक सुरक्षा कोषले आयोजना गरेको श्रम, रोजगार तथा सामाजिक सुरक्षा मन्त्रालय र होटल संघ नेपाल (हान)बीचको संयुक्त अन्तरक्रिया कार्यक्रममा मन्त्री विष्टले यो योजना श्रमिक र रोजगारदाताको हितमा भएको बताए । त्यस्तै न्युनतम पारिश्रमिक लागु गरी यो योजनामा आवद्ध भएमा श्रमिकहरुले आफू सुरक्षित छौं भनि निर्धक्क भएर काम गर्दा व्यवसायमा सकारात्मक प्रभाव पर्ने उनको भनाई छ ।

यो योजना लागु हुन सुरुसुरुमा केही असहज जस्तो देखिएपनि यसले श्रमिक र रोजगारदातालाई नै सहजता दिएकोले यसमा सबैको सहभागिता अनिवार्य रहेको उनको बुझाई छ । त्यस्तै यसको लागि सरकार निजी क्षेत्रका गुनासाहरुलाई समेटेर अगाडी बढ्ने उनले बताए । ऐन र कानुनले नै व्यवस्था गरेको यस्तो व्यवस्थाको विरुद्ध अब कसैले पनि काम गर्न नहुने मन्त्री विष्टले जानकारी दिए ।

त्यसैगरी हानकी अध्यक्ष सृजना राणाले होटल व्यवसायीहरुले अन्य संघ संस्थाहरुले भन्दा कर्मचारीहरुलाई २ गुणा बढी सेवा सुविधाहरु दिएकोले सामाजिक सुरक्षा कोष प्रति साना होटल व्यवसायीले गुनोसो गरेको बताईन् । त्यसमा सरकारको पक्षबाट हेरफेर गर्नुपर्ने उनको भनाई छ ।

Leave a Reply

Your email address will not be published. Required fields are marked *