लगातार ओरालो लागेको नेप्से ४.८७ अंकले बढ्यो, कारोबार रकम भने २४ करोडमा सीमित
काठमाडौं, १० भदौ । केही सातादेखि लगातार ओरालो लागेको नेपाल स्टक एक्सचेन्ज (नेप्से)मा कारोबारको तेस्रो दिन मंगलबार आज भने सुधार देखिएको छ । आज नेप्से ४.८७ अंकले वृद्धि भई १२०८.०० विन्दुमा रोकिएको हो ।
१ सय ६७ कम्पनीको ८ लाख ५० हजार ३ सय ८६ कित्ता सेयर २४ करोड ४६ लाख रुपैयाँमा खरिद–विक्री भएको छ । त्यस्तै हिजो भने ३८ करोड ८ लाख रुपैयाँको सेयर कारोबार भएको थियो । आज सबैभन्दा बढी सेयर कारोबार एनआईसी एशिया बैंक लिमिटेडको भएको छ । उक्त बैंकको २ करोड ३६ लाखभन्दा बढीको सेयर कारोबार भएको हो ।
त्यसैगरी नेप्सेमा सूचिकृत ११ समूहमध्ये दुई समूहको उपसूचकमा गिरावट आएको छ भने अन्य बाँकी समूहको उपसूचकमा बृद्धि भएको छ । उपसूचक गिरावट आउँनेमा होटेल समूह र निर्जीवन बीमा समूह रहेका छन् । होटेल समूहको उपसूचकमा ८.९४ अंकले गिरावट आएको छ भने निर्जीवन बीमा समूहको उपसूचकमा १२.८८ अंकले गिरावट आएको छ ।
