राष्ट्र बैंकका डेपुटी गभर्नर श्रेष्ठ निलम्बित, छानबीन गर्न श्रीराम पौडेलको नेतृत्वमा समिति

काठमाडौं, १८ कार्तिक । वित्तिय क्षेत्रमा अराजकता निम्त्याउन सहयोग गरेको आरोप लागेका डेपुटी गभर्नर शिवराज श्रेष्ठमाथि छानबिनका लागि नेपाल राष्ट्र बैंक सञ्चालक समितिले सञ्चालक समिति सदस्य श्रीराम पौडेलको संयोजकत्वमा सदस्यहरु रामजी रेग्मी र सुबोधकुमार कर्ण सम्मिलित तीन सदस्यीय समिति गठन गरेको छ ।

मन्त्रिपरिषद्ले वित्तिय क्षेत्रको अनुशासन भत्काउन बल पुर्याएको भन्दै डेपुटी गभर्नर शिवराज श्रेष्ठमाथि छानबिन गर्ने निर्णय गरेको थियो । उक्त निर्णयपछि छानबिनका लागि केन्द्रीय बैंक सञ्चालक समितिले छानबिन समिति निर्माण गरेको छ । यससँगै डेपुटी गभर्नर श्रेष्ठ निलम्बनमा परेका छन् । यद्यपि उनले समिति समक्ष सफाइ पेश गर्न पाउनेछन् । समितिले उनीसँग सोधेको स्पष्टीकरणमा पेश भएको उनको स्पष्टीकरण चित्त नबुझे उनलाई बर्खास्तगीका लागि सिफारिश गर्न सक्नेछ । समितिको सिफारिशका आधारमा सरकारले उनलाई बर्खास्त गर्न सक्नेछ । श्रेष्ठलाई बैंकहरुको खराब कर्जा लुकाउन मद्दत गरेको, वित्तिय अनुशासन भत्काएको, एनसेलको लाभांश फिर्ताका लागि राष्ट्र बैंकबाट मद्दत गरेको जस्ता आरोप लगाइएको छ ।

छानबिन समितिका संयोजक तथा सञ्चालक समिति सदस्य पौडेल पूर्व माओवादी निकट हुन् । त्रिभुवन विश्वविद्यालयका प्राध्यापक पौडेल यसअघि अर्थमन्त्रालयका सल्लाहकार साथै नेकपाका अध्यक्ष प्रचण्ड प्रधानमन्त्री हुँदा उनका आर्थिक सल्लाहकार थिए ।

श्रेष्ठमाथिका उजुरीका आधारमा सरकारले उनीमाथि छानबिन गराउने निर्णय लिएको हो । गठित छानबिन समितिले एक महिनाभित्र प्रतिवेदन तयार गर्नेछ । श्रेष्ठको डेपुटी गभर्नरको पदावधि डेढ वर्ष बाँकी थियो । छानबिनबाट उनी दोषी प्रमाणित भएमा सरकारले उनलाई बर्खास्त गरी गभर्नरको सिफारिशमा डेढ वर्षका लागि वर्तमान कार्यकारी निर्देशकहरुमध्येबाट एकजनालाई डेपुटी गभर्नर नियुक्त गर्न सक्नेछ ।

Leave a Reply

Your email address will not be published. Required fields are marked *