अवैध रुपमा सञ्चालित विदेशी च्यानललाई कारवाहीको दायरामा ल्याईदै, मेरो टिभिलाई पत्र काट्यो विभागले

काठमाडौ, २४ मंसिर । सुचना तथा प्रसारण विभागले स्ट्रीम नेटवर्क प्रालि (मेरो टिभी) लाई अवैधानिक च्यानल बन्द गर्न पत्राचार गरेको छ । अवैधरुपमा विदेशी टेलिभिजन च्यानल डाउनलोड गरी प्रसारण भई रहेको पार्ईएपछि सरकारले त्यस्ता केवल अपरेटरलाई कारवाहीको दायरमा ल्याउँने भएको हो ।
विभागले यस अघि सोनी, जी र कर्लस लगायतका विदेशी च्यानलको आधिकारीक सिग्नल वितरणक रियलटेक नेटवर्क र डिजिटल सिस्टम प्रालिसँग सम्झौता नगरी अवैधानिक माध्यम र साधन प्रयोग गरी च्यानल सञ्चालन गरेको भेटिए पछि पत्र काटेको थियो ।
सरकारले ‘क्लिन फिड’ नीति लागू गर्ने तयारी गरिरहेको सन्दर्भमा विदेशी च्यानल अवैधरूपमा प्रसारण भइरहेको र त्यसबाट डीटीएच (डाइरेक्ट टु होम) को प्रयोगबाट ग्राहक तथा सरकारलाई समेत ठगी भइरहेको गुनासो आएपछि विभागले डिभाइन स्ट्रिम नेटवर्क प्रालिलाई एक साताको समयसीमासमेत दिएको थियो ।
उक्त कम्पनीले फागुनदेखि नै सोनी पिक्सर्च नेटवर्क इण्डिया, इण्डियाकास्ट मिडिया डिष्ट्रिब्युसन र डिस्कभरी नेटवर्क एशिया प्यासिफिकअन्तर्गत विभिन्न सःशुल्क च्यानलहरू अवैध डीटीएचमार्फत प्रसारण गरेको आरोप छ । ती च्यानलको आधिकारिक कारोबार गर्ने संस्था अर्कै भए पनि मोबाइल एप्सको समेत प्रयोग गरी नेपालमा अवैध प्रसारण गरेको पाइएको छ ।
राष्ट्रिय प्रसारण नियमावलीमा सर्तबमोजिम काम गर्ने मौका दिँदा पनि अटेर गरेमा मन्त्रालयले त्यस्तो प्रसारण संस्थाको इजाजतपत्र रद्द गर्न सक्ने प्रावधान छ । सम्झौताअनुसार आधिकारिक संस्थासँग अनुमति लिएर त्यसको शर्त पूरा गरेर च्यानल प्रसारण गर्न पाउने भएपनि त्यस्तो नभएको पाइएको विभागको पत्रमा उल्लेख छ ।