सवा एक अर्ब लगानीमा १५ वटा सहकारी बजार निर्माण गरिदै
काठमाडौं, ११ पुस । भूमि व्यवस्था, गरिबी निवारण तथा सहकारी मन्त्रालयले १ अर्ब १४ करोड लगानीमा १५ वटा सहकारी तरकारी तथा फलफुल बजार निर्माण गर्ने भएको छ । तरकारी बजारमा सक्रिया विचौलियो प्रणालीको अन्त्य गर्न सरकारले बजार विस्तार गर्ने योजना बनाएको हो ।
संयुक्त राष्ट्रसंघीय विकास कार्यक्रम (यूएनडीपी) को सहयोगमा काठमाडौं सहित आसपासका ६ जिल्लामा संकलन केन्द्र र सहकारी बजार स्थापना गर्न लागिएको हो । काठमाडौमा चार वटा अन्य स्थानमा ११ वटा बजार निर्माण गर्न लागिएको मन्त्रालयका उप सचिव अनन्त बस्नेतले बताए । नुवाकोट, धादिङ, काभ्रे, मकवानपुर, चितवनमा संकलन केन्द्र तथा तरकारी बजार र काठमाडौं उपत्यकामा चार ठाउँमा तरकारी बजार स्थापना हुने भएको छ।
बजार निर्माणका लागि अनुमान गरिएको रकमध्ये ५१ करोड सरकारले र २० करोड यूएनडीपीले खर्च गर्नेछन्। नपुग ४४ करोड रुपैयाँ सरकार र यूएनडीपीले लगानी गर्ने भएका छन्। बजार व्यवस्थापन भइसकेपछि यस कार्यक्रमले तरकारी र फलफूलको क्षेत्रमा देशलाई आत्मनिर्भर बनाउने लक्ष्य राखिएको छ।
मन्त्रालयका अनुसार काठमाडौंको चाबहिलमा सहकारी बजार निर्माण अन्तिम चरणमा पुगेको छ। आगामी तीन महिनाभित्रै बजार सञ्चालन हुनेछ । चाबहिलको सरस्वतीनगर, ललितपुरको महालक्ष्मी नगरपालिकामा स्टाटेलाइट बजार निर्माण हुनेछ। काठमाडौं उपत्यकाका अन्य ठाउँमा जग्गा खरिद तथा लिजमा लिनेकाम सुरु भएको मन्त्रालयले जनाएको छ । चितवनमा क्षेत्रीय र काठमाडौंमा केन्द्रीय बजार स्थापना हुन हुनेछ। तरकारी बजारका लागि १८ स्थानीय तहका ७२ वटा सहकारी छनोट भएका छन्। पकेटक्षेत्रका रूपमा ती संस्था छनोट गरिएको हो।
