१६ करोड रुपैयाँले बढ्यो सेयर कारोबार, लगानीकर्ता नजर शिवम् सिमेण्टको सेयरमा
काठमाडौं, १७ पुस । साताको अन्तिम कारोबार दिन बिहीबार (आज) नेप्से परिसूचक घटेर बन्द भएको छ । बुधबार ३.४७ अंकले वृद्धि भएको नेप्से परिसूचक आज ३.२९ अंकले गिरावट आई ११६६.२१ विन्दुमा रोकिएको हो । तर, कारोबार रकममा भने सुधार भएको छ । बुधबार ३७ करोड २९ लाख रुपैयाँको करोबार भएकोमा आज ५३ करोड २२ लाख रुपैयाँको कारोबार भएको छ । यो रकम बुधबारको तुलनामा १६ करोड रुपैयाँ बढी हो । आज एक सय ७० कम्पनीको १६ लाख ६० हजार ४ सय ६ कित्ता सेयर खरिद–विक्री भएको छ ।
बिहीबार सबैभन्दा बढी सेयर कारोबार शिवम् सिमेण्टको
आज सबैभन्दा बढी सेयर बारोबार शिवम् सिमेण्टको भएको छ । शिवम् सिमेण्टको ९ करोड २१ लाख रुपैयाँभन्दा बढीको सेयर कारोबार भएको हो । उक्त कम्पनीको कारोबार बन्द हुँदासम्म प्रतिसेयर मूल्य ४ सय ८९ रुपैयाँ पुगेको छ । त्यस्तै बढी सेयर कारोबार हुँने दोस्रोमा नेपाल लाईफ इन्स्योरेन्स कम्पनी छ । नेपाल लाईफको ३ करोड ११ लाख रुपैयाँभन्दा बढीको सेयर कारोबार भएको हो ।
कारोबारमा आएका १२ समूहमध्ये ३ समूहको परिसूचकमा वृद्धि भएको छ भने बाँकी ९ समूहको परिसूचकमा गिरावट आएको छ । परिसूचक वृद्धि हुनेमा हाइड्रोपावर समूह ०.२४ प्रतिशत, उत्पादन तथा प्रशोधन समूह १.७४ प्रतिशत र माइक्रोफाईनान्स समूह ०.९४ प्रतिशत रहेका छन् । आज सर्वाधिक परिसूचक वृद्धि हुनेमा उत्पादन तथा प्रशोधन समूह छ भने सर्वाधिक परिसूचक घट्नेमा होटेल समूह छ । होटेल समूहको ३.६६ प्रतिशतले परिसूचकमा गिरावट आएको छ ।
