बैंकमा हुने भिडभाड कम गर्न बैंकर्स संघले डिजिट कारोबारलाई निःशुल्क बनाउने
काठमाडौं, ६ चैत । नेपाल बैंकर्स संघले बैंक तथा वित्तीय संस्थामा हुने भिडभाडलाई कम गर्न डिजिटल माध्यमबाट हुने कारोबार निःशुल्क बनाउने भएको छ । कोरोनाको संक्रमणबाट बच्न सरकारले हिजो मात्र २५ जना भन्दा बढी भेला हुन प्रतिवन्ध लगाएपछि संघले यस्तो योजना बनाएको हो ।
त्यसका लागि आज संघको डिजिल मिटिङ बस्दैछ । उक्त मिटिङले आगामी एक महिनासम्म एटिएमबाट पैसा निकाल्दा, इन्टरनेट र क्युआर कोर्डबाट भुक्तानी गर्दा कुनै पनि शुल्क नलिने निर्णय गर्ने अध्यक्ष भुवन दाहालले जानकारी दिए ।
बैंकमा हुने भिडभाड कम गर्न सामाजिक उत्तरदायित्व अन्तर्गत छुट दिन लागिएको हो । कोरोनाको त्रास थप बढ्दै गए छुटको समयावधि बढाउने अध्यक्ष दाहालले जानकारी दिए । यसका लागि डेभलपमेन्ट बैंकर्स एसोसिएसनसँग पनि सहकार्य भइरहेको उनले बताए ।
यसले डिजिटल कारोबारलाई समेत बढावा दिने बताइएको छ ।
