एनआईसी एशिया बैंकले ऋणीलाई ब्याजमा १० प्रतिशत दिने
काठमाडौं, ५ वैशाख। एनआईसी एशिया बैंकले ऋणीले बुझाउन पर्ने ब्याज रकममा छुट प्रदान गर्ने योजना सार्वजनिक गरेको छ । बैंकले कोरोना भाइरस संक्रमणको असहज परिस्थितिमा आफ्ना ऋणीहरुलाई सहुलियत प्रदान गर्न उक्त योजना सार्वजनिक गरेको हो ।
बैंकबाट कर्जा सुविधा उपयोग गरेका ग्राहकहरुले वैशाख मसान्तसम्ममा चुक्ता भुक्तान गर्नुपर्ने सम्पूर्ण मासिक तथा त्रैमासिक किस्ता, ब्याज लगायत तिर्न बाँकी रहेको वक्यौता साँवा तथा ब्याज भुक्तानी गरेमा बुझाएको साधारण ब्याजको १० प्रतिशतले हुन आउने रकम तथा जरिवाना ब्याजको शतप्रतिशत रकम छुट प्रदान गरिने कम्पनीले जनाएको छ ।
यो सुविधा मासिक तथा त्रैमासिक किस्ताबन्दी कर्जाहरुका साथै चालूपुँजी कर्जा तथा अन्य रिभल्विङ प्रकृतिका कर्जाहरुमा लगायत बैंकबाट प्रवाह भएका सम्पूर्ण कर्जाहरुमा लागू हुनेछ । उक्त छुट रकम २०७७ जेठ महिनाको पहिलो हप्ताभित्र सम्बन्धित ग्राहकको खातामा जम्मा गरिनेछ । तर यसरी ब्याज छुट दिँदा छुटपश्चात ग्राहकले तिर्नुपर्ने ब्याज आधार दरबाट गणना हुने ब्याजभन्दा कम नहुने बैंकले जनाएको छ ।
बैंकले नेपाल राष्ट्र बैंकको २०७६ चैत १६ गतेको निर्देशन अनुसार २०७६ चैत मसान्तभित्र भुक्तानी गर्नुपर्ने मासिक वा त्रैमासिक किस्ताबन्दी कर्जाहरूमा ग्राहकहरूले चैत महिनाभित्र नै ब्याज तथा किस्ता बुझाएमा किस्तामा समाविष्ट ब्याज रकममा १० प्रतिशत छुट प्रदान गरिसकेको र विभिन्न छुट तथा सहुलियतहरू प्रदान गरेको बताएको छ ।
