दक्षिण एशियाको आर्थिक वृद्धिदर ४० वर्षयताकै सर्वाधिक खराब, नेपालको २.८ प्रतिशतसम्म रहने

काठमाडौं, १० वैशाख । विश्व बैंकले दक्षिण एशियाको आर्थिक वृद्धिदर विगत ४० वर्ष यताकै खराब स्थितिमा पुगेको बताएको छ । ‘कोरोना भाइरस (कोभिड–१९) को महामारीले दक्षिण एशियाली अर्थतन्त्र र नेपालमा पार्ने प्रभाव’ विषयमा नेपाल आर्थिक पत्रकार समाज (सेजन)ले बुधवार आयोजना गरेको भिडियो संवादमा नेपालका लागि विश्व बैंकका देशीय प्रबन्धक फेरिसले यस्तो बताएका हुन् ।
महामारीभन्दा पहिला दक्षिण एशियाको आर्थिक वृद्धिदर ६.३ प्रतिशत रहने अपेक्षा गरिएको भन्दै उनले कोभिड–१९ का कारण यस क्षेत्रको वृद्धिदर सन् २०२० मा १.८ देखि २.८ प्रतिशतको बीचमा रहने बताए । आर्थिक वर्ष २०२१ मा पनि दक्षिण एशियाको वृद्धिदर ३.७ देखि ४.२ प्रतिशतको मध्यम स्तरमा रहने अपेक्षा गरिएको फेरिसको धारणा छ ।
यस्तै नेपाल दुई ठूला छिमेकीहरूको बीचमा अवस्थित भएको र ती छिमेकीहरूको समेत वृद्धिदरमा कमी आउने भएकाले नेपालको जीडीपी वृद्धिदरमा समेत त्यसको नकारात्मक प्रभाव पर्ने उनले औंल्याएका छन् । विश्व बैंकका अनुसार कोरोना भाइरस (कोभिड–१९) को कारण चालू आर्थिक वर्षमा नेपालको कुल गार्हस्थ्य उत्पादन (जीडीपी) को वृद्धिदर १.५ देखि २.८ प्रतिशतबीच रहने प्रक्षेपण गरिएको छ । आपूर्ति प्रणालीमा पर्ने प्रभावको कारण नेपालमा मुद्रास्फीतिदर ६ प्रतिशतभन्दा माथि रहने, वित्तीय घाटा र चालू घाटा दुवै विस्तारित हुने अनुमान गरिएको उनले बताएका छन् ।
फेरिसले विश्व बैंक नेपालमा महामारीको सामना गर्न र अर्थ व्यवस्थाको पुनर्बहालीका लागि सरकारसँग मिलेर काम गर्ने गरिरहेको भन्दै आगामी दिनमा पनि बिश्व बैकको सहयोग निरन्तर रहने बताए । उनले विश्व बैंकले आगामी वर्ष प्राथमिकताका आधारमा काम गर्ने समेत उनको भनाइ छ, जसअनुसार पहिलो प्राथमिकता तत्काल स्वास्थ्यका लागि चाल्नुपर्ने कदम, दोस्रो तत्काल सामाजिक सहयोग र रोजगारी, तेस्रो वस्तुको उत्पादन वितरणको सुनिश्चितता र चौथो समष्टिगत आर्थिक स्थायित्वको लागि काम गर्ने उनले बताए ।
विश्व बैंकले विद्यमान आफ्नो कुल लगानी (पोर्टफोलियो) परियोजनाहरूबाट पोर्टफोलियाको १८ प्रतिशत कोभिड–१९ को प्रतिक्रित्मक क्षेत्रमा केन्द्रित गरेको जानकारी दिँदै उनले हरेक देशले यसैगरी प्राथमिकता निर्धारण गर्न आवश्यक रहेको धारणा राखे ।