१० युनिटसम्म विद्युत खपत गर्नेले आगामी वर्षदेखि शूल्क तिर्नु नपर्ने
काठमाडौं, २७ जेठ । आगामी आर्थिक वर्षदेखि १० युनिटसम्म विद्युत खपत गर्ने ग्राहकलाई सधैका लागि निःशूल्क वितरण गरिने भएको छ । विद्युत नियमन आयोग र नेपाल विद्युत प्राधिकरणको सहकार्यमा यस्तो व्यवस्था गरिने ऊर्जामन्त्री वर्षमान पुनले संसद्मा जानकारी दिए । यसको लागि विद्युत नियमन आयोगले काम गरिरहेको उनले बताए ।
यसरी छुट दिँदा ८ लाख ६१ हजार ग्राहकलाई प्रत्यक्ष लाभ पुग्ने उनको भनाई छ । ‘विद्युत नियमन आयोगमा यो प्रस्ताव गरेका छौं ।’ उनले भने ‘विद्युत प्राधिकरणले मूल्य समायोजन गर्दै छ । योसँगै १० युनिटसम्म उपभोग गर्ने ८ लाख ६१ हजार ग्राहकलाई सधैको लागि निःशूल्कमा वितरण गर्ने व्यवस्था हामी गर्दै छौं ।’
त्यस्तै लकडाउन अवधिमा १५० युनिट खपत गर्ने ३१ लाख ३० हजार रहेको र उनीहरुको लागि २५ प्रतिशत छुटको व्यवस्था गरिएको मन्त्री पुनले बताए । बजेटमा २५० युनिट खपत गर्ने ग्राहकको लागि १५ प्रतिशत छुट दिने आगामी बजेटमा उल्लेख छ ।
