१० महिनामा रू. ४१ अर्ब ६० करोडको खाद्य तेल आयात
काठमाडौं, १७ असार । नेपालमा वर्षेनि खाद्य तेलको आयात बढिरहेको छ । खाद्य तेलामा आत्मनिर्भर बन्न सकिने विभिन्न आधार भए पनि सरकारको ठोस नीति तथा कार्यक्रम नहुँदा यस्ता वस्तुमा सधैं आयातकै भर पर्नुपर्ने बाध्यता छ । चालू आर्थिक वर्षको १० महिना (वैशाख मसान्तसम्म)को तथ्यांक हेर्ने हो भने नेपालमा विभिन्न प्रकारका गरी ४१ अर्ब ६० करोड रुपैयाँ बराबरको खाने तेल आयात भएको देखिन्छ ।
विभागको तथ्यांक अनुसार नेपालमा विशेषगरी जाडो महिनामा खाने तेलको आयात बढी भएको पाइन्छ । चालू आवको पहिलो महिना साउनमा ३ अर्ब ५६ करोड रुपैयाँ बराबरको खाद्य तेल आयात भएकोमा जाडो याम लागेसँगै कात्तिकमा ४ अर्ब ४९ करोड, मंसिरमा ५ अर्ब २२ करोड र पुसमा ४ अर्ब ५० करोड रुपैयाँ बराबरको आयात भएको छ । तेलहन वस्तुको उत्पादनमा प्रोत्साहन, अनुदान, मलबीउमा सहुलियत, बीमा बजारीकरण लगायत पक्ष सरकारले विशेष व्यवस्था गर्न सके यस्ता वस्तुको उत्पादनमा नेपाल आत्मनिर्भर बन्न सक्ने विज्ञहरु औंल्याउँछन् ।
