सुनको मूल्यमा दिनदिनै नयाँ रेकर्ड, मंगलवारको मूल्य रू. ९८ हजार २००
काठमाडौं, १३ साउन । नेपालको बजारमा सुनको मूल्यले दिनदिनै नयाँ नयाँ रकेर्ड राख्ने क्रम जारी छ । गत हप्ताको सोमवारदेखि ठूलो अन्तरले बढ्न थालेको सुनको मूल्य आज (मंगलवार) अघिल्लो दिनको तुलनामा ७०० बढेर छापावाल सुनको मूल्य तोलाकै ९८ हजार २०० रुपैयाँ पुगेको छ ।
यस दिन तेजावी सुनको मूल्य पनि अघिल्लो दिनको तुलनामा ७ सय नै बढेर प्रतितोला ९७ हजार ७६० पुगेको छ । मंगलवार चाँदीको मूल्य पनि सोमवारको तुलनामा ३५ रुपैयाँ बढेर १२ सय ४५ पुगेको छ ।
आगामी दिनमा मूल्य अझै माथि जाने अनुमान गरिएको छ । यही महिना अन्तर्राष्ट्रिय बजारमा प्रतिऔस २ हजार डलर पुग्ने अनुमान गरिएको छ। अन्तर्राष्ट्रिय बजारमा २ हजार डलर पुग्दा यहाँ प्रतितोला करिब १ लाख रुपैयाँसम्म पुग्ने महासंघका पूर्व अध्यक्ष मणिरत्न शाक्यले बताए ।
त्यती मात्र नभई केही समयपछि अन्तर्राष्ट्रिय बजारमा २२ सय डलर पुग्ने प्रक्षेपण गरिएको छ । सो समय नेपाली बजारमा सुन तोलाको १ लाख २५ हजार रुपैयाँ हाराहारीमा पुग्ने छ।
