सक्रिय कोरोना संक्रमितको संख्या ५३३८, आज ९३ जना डिष्चार्ज भए
काठमाडौं, १७ साउन । हालसम्म कोरोना संक्रमितको संख्या २० हजार ८६ पुगेको भएपनि सक्रिय संक्रमितको संख्या ५ हजार ३३८ रहेको छ । स्वास्थ्य तथा जनसंख्या मन्त्रालयका अनुसार हालसम्म कोरोना भाइरसको संक्रमण देखिएकामध्ये १४ हजार ४९२ जना संक्रमणबाट मुक्त भएर घर फर्किएका छन् भने ५६ जनाको मृत्यु भएको छ ।
हाल प्रदेश नं. १ मा २२५ जनामा कोरोना भाइरसको संक्रमण सक्रिय छ भने प्रदेश नं. २ मा २ हजार ६६, वागमति प्रदेशमा ५७५, गण्डकी प्रदेशमा ३१३, प्रदेश नं. ५ मा ३८७, कर्णाली प्रदेशमा २९७ र सुदूरपश्चिम प्रदेशमा १ हजार ६७५ जनामा कोरोना भाइरस संक्रमण सक्रिय रहेको मन्त्रालयका प्रवक्ता डा. जागेश्वर गौतमले जनाकारी दिए ।
त्यस्तै पछिल्लो २४ घण्टामा पिसीआर विधिबाट ६ हजार ९९३ परिक्षण गरिएको छ । हालसम्म पिसीआर विधिबाट ३ लाख ८२ हजार ४९० परिक्षण भएको छ । आज ३१५ जनामा कोरोना भाइरस संक्रमण पृष्टि भएको छ । लकडाउन खुलेपश्चात संक्रमितको संख्या वढ्दै गएको भन्दै प्रवक्ता गौतमले सबैलाई सजग रहन अनुरोध गरेका छन् । उनले सभा सम्मेलन र पाटि आयोजना नगर्न पनि सुझाएका छन् ।
