वामदेव गौतमलाई राष्ट्रियसभामा सिफारिश गर्ने नेकपाको निर्णय, खतिवडा विवादमा पर्न चाहेनन्
काठमाडौं, १८ भदौ । सत्तारुढ नेकपाको सचिवालयले यसका उपाध्यक्ष वामदेव गौतमलाई राष्ट्रियसभामा पठाउने निर्णय गरेको छ । राष्ट्रपतिबाट नियुक्त भएका राष्ट्रिय सभाका एकजना सदस्य हालका अर्थ एवं सञ्चार र सूचना प्रविधि मन्त्री डा. युवराज खतिवडाको कार्यकाल फागुन २० मा समाप्त भएपछि उक्त पद रिक्त छ । प्रधानमन्त्री ओलीले उक्त पद रिक्त राखेरै खतिवडालाई त्यसपछिका ६ महिनाका लागि उनको पोर्टफोलियोमा निरन्तरता दिएका थिए । यसबीचमा वामदेव गौतमलाई प्रतिनिधि सभामा ल्याउन आश्वस्त गरेर उनी खतिवडालाइ नै राष्ट्रिय सभामा सिफारिश गर्ने पक्षमा थिए । खतिवडाको कार्यकाल फागुन २० मा समाप्त भएपछि नेकपा सचिवालयले राष्ट्रिय सभामा उपाध्यक्ष गौतमलाई पठाउने निर्णय गरेको थियो । यद्यपि प्रम ओलीले त्यसलाई कार्यान्वयन नगरी थाती राखेको थिए ।
उनले खतिवडालाई नै निरन्तरता गर्नेगरी ६ महिनासम्म पार्टीको निर्णय कार्यान्वयन नगरी बसेका थिए ।
पार्टीको निर्णय कार्यान्वयन गर्नुपर्ने पक्षमा सचिवालयमा बहुमत भएपछि प्रम ओलीको इच्छा अल्पमतमा परेको थियो । त्यसो त अर्थमन्त्री खतिवडाले बुधबार नै पार्टीका अध्यक्षद्वय ओली र प्रचण्डलाई भेटेर आफ्नो कारणले पार्टीमा विवाद नहोस् भन्ने चाहेको बताएका थिए । उनले आफू विवादमा पर्न नचाहेकोले पार्टी निर्णय कार्यान्वयन गर्न प्रधानमन्त्रीलाई पनि सुझाएका थिए । यसअघि स्थायी समितिको बैठकमा प्रम ओली अल्पमतमा पर्दा उपाध्यक्ष वामदेव गौतमले ओलीलाई साथ दिएका थिए । त्यसपछि वामदेव गौतमको भैसेपाटी स्थित निवासमा ओली र वामदेव गौतमको पारिवारिक भेटघाट समेत भएको थियो ।
प्रम ओलीले अर्थमन्त्रीमा खतिवडालाई निरन्तरता दिन वामदेव गौतमलाई प्रतिनिधिसभामा निर्वाचित गराउनेदेखि उनकी श्रीमति तुलसा थापालाई मन्त्री बनाउनेसम्मको विकल्प दिदाँ पनि गौतम राजी नभएको बताइन्छ ।
