सामुहिक लगानी कोष संशोधित नियमावली लागु, एक्जिट फि योजनाको आयमा लेखाङ्कन गर्नु पर्ने
काठमाडौं, २५ भदौ । नेपाल धितोपत्र बोर्डले अर्थ मन्त्रालयले स्वीकृती दिएको सामुहिक लगानी कोष (चौथो संशोधन) नियमावली, २०७७ लागु गरेको छ । बोर्डले भदौ २४ गते (बुधबार)देखि उक्त संशोधित नियमावली लागु गरेको हो ।
बोर्डले संशोधनमार्फत योजना व्यवस्थापकले खुलामुखी योजनाको इकाई पुनः खरिद गर्दा लिने शुल्क (एक्जिट फि) योजनाको आयमा लेखाङ्कन गर्नुपर्ने व्यवस्था गरेको छ । यस अघि उक्त आयको लेखाङ्कन योजना व्यवस्थापकले गर्ने गरेका थिए । यो व्यवस्थाले इकाईधनी (लगानीकर्ता) को कोष मजबुत भइ बढी प्रतिफल पाउन सहयोग पुग्ने बोर्डले उल्लेख गरेको छ ।
त्यस्तै उक्त नियामवलीको नियम ४० को उपनियम ४ मा योजना व्यवस्थापक र योजनाको लेखा परिक्षकको नियुक्ति गर्दा बोर्डलाई जानकारी दिएर नियुक्त गर्न सक्ने व्यवस्था गरिएको छ । यसअघि बोर्डबाट स्वीकृती लिएर मात्र नियुक्ति गर्न सकिने व्यवस्था रहेको थियो । उक्त व्यवस्था लागू भएसँगै खुलामुखी सामुहिक लगानी योजनाको आयमा वृद्धि भई लगानीकर्ताको हित हुने बोर्डले अपेक्षा गरेको छ ।