भारतीय कामदार आउन दिनुपर्ने मागसहित कैलाली उवासंघद्वारा मन्त्री भट्टलाई ज्ञापनपत्र

धनगढी, २१ असोज । भारतीय कामदार अभावमा नेपालका विभिन्न काम प्रभावित भएको भन्दै कैलाली उद्योग वाणिज्य संघले स्वास्थ्य मापदण्ड अपनाएर भारतीय कामदार ल्याउन पाउनुपर्ने माग गरेको छ । संघले उक्त मागसहित उद्योग वाणिज्य तथा आपूर्तिमन्त्री लेखराज भट्टलाई ज्ञापनपत्र बुझाएको छ । मंगलवार साँझ मन्त्री भट्टको निजी निवास अत्तरियामै पुगेर संघको टोलीले ज्ञापनपत्र बुझाएको हो ।
कोरोना संक्रमणका कारण लकडाउन भएसँगै भारतीय कामदार स्वदेश फर्किएका थिए । अहिले नेपाली कामदार पनि कामका लागि दैनिक भारत गइरहेका छन् । दशैं तिहार नजिकिँदै गर्दा समेत व्यवसाय उकासिन नसकेको भन्दै संघले दक्ष कामदार भित्रिन दिनुपर्ने माग राखेको हो । ज्ञापनपत्र बुझाउने टोलीमा कैलाली उद्योग वाणिज्य संघका अध्यक्ष पुष्पराज कुँवर, वरिष्ठ उपाध्यक्ष पुस्कर ओझा, सचिव शिद्धराज पनेरु, सदस्य मनोज अग्रवाल र कार्यकारी निर्देशक गोमा अधिकारी लगायत थिए ।