फ्रिक्वेन्सी पाए देशभर दैनिक दुई घण्टा निःशुल्क इन्टरनेट दिने वर्ल्डलिङ्कको घोषणा
काठमाडौं, २२ असोज । वर्ल्डलिङ्कले फ्रिक्वेन्सी पाएको खण्डमा देशभर दैनिक दुई घण्टा निःशुल्क इन्टरनेट दिने घोषणा गरेको छ । एक्सप्रेस वाईफाईका लागि फेसबुकसँग भएको सहकार्यको विषयमा जानकारी दिन बिहीबार आयोजित पत्रकार सम्मेलनमा कम्पनीका अध्यक्ष तथा प्रबन्ध निर्देशक दिलिप अग्रवालले यस्तो घोषणा गरेका हुन् ।
फ्रिक्वेन्सी उपलब्ध भएमा निःशुल्क इन्टरनेट हरेक डिभाइसमा दैनिक दुई घण्टासम्म निःशुल्क इन्टरनेट दिइने उनले बताए । निम्न वर्गका प्रयोगकर्तासम्म पुग्ने कम्पनीको लक्ष्य अनुरुप नै आफूहरुले फ्री वाईफाई परियोजना सुरु गरेको अध्यक्ष अग्रवालले बताए ।
त्यस्तै कम्पनीले आगामी तीन वर्षमा देशका ३० हजार स्थानमा फ्री वाईफाई सेवा विस्तार गर्ने घोषणा समेत गरेको छ । कम्पनीको वाईफाई परियोजनाका म्यानेजर पुनित मानन्धरले हाल १० हजार स्थानमा उपलब्ध भइरहेको कम्पनीको फ्री वाईफाई सेवा आगामी दिनमा थप विस्तार गरिने बताए ।
उनका अनुसार हाल फ्री वाईफाई उपलब्ध भइरहेका १० हजारमध्ये सात हजार ५ सय स्थानमा फेसबुकको एक्सप्रेस वाईफाई उपलब्ध भइसकेको छ ।
नियामकको निर्देशिका अनुरुप वाईफाई सेवा सुरक्षित बनाइएको कम्पनीले जनाएको छ । वर्डलिङ्कले टाइम र भोलुमको आधारमा फ्री वाईफाई उपलब्ध गराउँदै आएको छ । कम्पनीका प्रमुख प्राविधिक अधिकृत समित जनले यो परियोजनाले नेपालमा डिजिटल डिभाइडलाई कम गर्न योगदान पुर्याउने विश्वास व्यक्त गरे ।
