वैदेशिक रोजगारीमा जाने ७५ प्रतिशतले घट्दा पनि रेमिट्यान्स आय ११.२ प्रतिशतले बढ्यो

काठमाडौं, ६ पुस । चालू आर्थिक वर्ष २०७७÷०७८ को चार महिनामा नेपालमा ३ खर्ब ३७ अर्ब ७२ करोड रुपैयाँ रेमिट्यान्स भित्रिएको छ । राष्ट्र बैंकका अनुसार रेमिट्यानस आय ११.२ प्रतिशतले बढेको हो ।

अघिल्लो वर्षको सोही अवधिमा रेमिट्यान्स आय २.८ प्रतिशतले घटेको थियो । अमेरिकी डलरमा विप्रेषण आप्रवाह ६.४ प्रतिशतले बृद्धि भई २ अर्ब ८५ करोड पुगेको छ । अघिल्लो वर्ष यस्तो आप्रवाह १.९ प्रतिशतले घटेको थियो ।

समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ७५.८ प्रतिशतले कमी आई १९ हजार २ सय ५१ रहेको छ । अघिल्लो वर्षको सोही अवधिमा यस्तो संख्या ५.६ प्रतिशतले बढेको थियो ।