निर्यातको दोस्रो स्थानमा अलैंची, गत आवको तुलनामा ६४ प्रतिशतले बढ्यो

काठमाडौं, ११ पुस । चालू आर्थिक वर्षको ५ महिनामा मुलुकबाट सबैभन्दा धेरै निर्यात भएको वस्तुमा भटमासको तेलपछि दोस्रो स्थान अलैंचीले लिएको छ ।
भन्सार विभागका अनुसार आर्थिक वर्षको मंसिर मसान्तसम्ममा नेपालबाट ५० अर्ब ५ करोड ५६ लाख रुपैयाँको वस्तु निर्यात भएको छ, जसमध्ये १३ अर्ब ५० करोड ६३ लाख रुपैयाँ बराबरको ९३ करोड ५५ लाख ९७ हजार केजी भटमासको तेल निर्यात भएको छ भने यसपछि दोस्रो स्थानमा रहँदै ३ अर्ब ५ करोड रुपैयाँ मूल्य बराबरको ३७ लाख ९० हजार केजी अलैंची निकासा भएको छ, जुत गत आर्थिक वर्षको सोही अवधिको तुलनामा करिब ६४ प्रतिशत बढी हो ।
गत आर्थिक वर्षको मंसिरसम्ममा नेपालबाट १ अर्ब ८६ करोड रुपैयाँबराबरको अलैंची निर्यात भएको थियो । यो परिमाण अघिल्लो आवको सोही अवधिको तुलनामा ५०.७ प्रतिशत धेरै हो । अघिल्लो आवको पहिलो ५ महिनामा १ अर्ब २३ करोड रुपैयाँबराबरको अलैंची निर्यात भएको थियो ।
नेपालबाट निर्यात हुने अलैंचीको मुख्य बजार भारत हो । भारतमा यस वर्ष अलैंचीको उत्पादनमा ह्रास आएकाले भारततर्फ अलैंचीको निकासी बढेको सम्बद्ध व्यवसायीले बताएका छन् ।
नेपालको पूर्वी इलाम, पाँचथरलगायतका जिल्लामा बढी अलैंची उत्पादन हुन्छ । कृषि उपजमा अलैंचीलाई सरकारले निर्यात प्राथमिकताको वस्तुमा राखेको छ । नेपालबाट बढीभन्दा बढी निर्यातमा हुने तेस्रो वस्तु भने कालो चिया रहेको छ । विभागको तथ्यांक अनुसार चालू आवको ५ महिनामा २ अर्ब ३३ करोड ८५ लाख रुपैयाँ बरारबको चिया निकासी भएको छ । सो अवधिमा ७७ लाख ५४ हजार केजी कालो चिया निर्यात भएको हो ।