बैंकिङ क्षेत्रमा रहेको विदेशी विनिमय सञ्चितिले १३ महिनाको वस्तु तथा सेवाको आयात धान्ने
काठमाडौं, १ माघ । बैंकिङ क्षेत्रमा रहेको विदेशी विनिमय सञ्चितिले मुलुकको १३ महिनाको वस्तु तथा सेवाको आयात धान्ने देखिएको छ । कुल विदेशी विनिमय सञ्चितिमध्ये नेपाल राष्ट्र बैंकमा चालू आर्थिक वर्षको मंसिर मसान्तमा ५.९ प्रतिशतले वृद्धि भई रू. १२ खर्ब ९८ अर्ब ७२ करोड पुगेको छ । २०७७ असार मसान्तमा यो रू. १२ खर्ब २६ अर्ब १२ करोड थियो ।
राष्ट्र बैंकका अनुसार आर्थिक वर्षको पहिलो पाँच महिनाको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चितिले १४.४ महिनाको वस्तु आयात र १३.० महिनाको वस्तु तथा सेवा आयात धान्न पर्याप्त रहेको छ । समीक्षा अवधिमा विदेशी विनिमय सञ्चितिको कुल गार्हस्थ्य उत्पादन, कुल आयात र विस्तृत मुद्राप्रदायसँगका अनुपातहरू क्रमशः ३९.१ प्रतिशत, १०८.७ प्रतिशत र ३२.४ प्रतिशत रहेका छन् ।
चालू आर्थिक वर्षमा पहिलो ५ महिनामा कुल विदेशी विनिमय सञ्चिति भने ५.२ प्रतिशतले वृद्धि भएको छ । २०७७ असार मसान्तमा रू. १४ खर्ब १ अर्ब ८४ करोड बराबर रहेको २०७७ मंसिर मसान्तमा रू. १४ खर्ब ७४ अर्ब ३४ करोड पुगेको हो ।
