सम्पन्न हुने चरणमा भैरहवा विमानस्थल, पोखरा विमानस्थलको भौतिक प्रगति ७० प्रतिशत
काठमाडौं, ५ फागुन । निर्माणाधीन राष्ट्रिय गौरवका दुई अन्तरराष्ट्रिय विमानस्थल निर्माणको भौतिक प्रगति उल्लेख्य रहेको पाइएको छ । भैरहवा अन्तरराष्ट्रिय विमानस्थल सम्पन्न हुने चरणमा छ भने पोखरा क्षेत्रीय अन्तरराष्ट्रिय विमानस्थल निर्माण पनि तीव्ररूपमा भइरहेको नियामक निकाय नेपाल नागरिक उड्डयन प्राधिकरण (क्यान)ले जानकारी दिएको छ ।
क्यानका अनुसार हालसम्म भैरहवा विमानस्थलको भौतिक प्रगति ९८.८ प्रतिशत रहेको छ भने पोखरा क्षेत्रीय अन्तरराष्ट्रिय विमानस्थल निर्माण ७० प्रतिशत सम्पन्न भएको छ ।
कोभिड महामारीको असहज परिस्थितिमा पनि निर्माणाधीन राष्ट्रिय गौरवका यी आयोजनाको प्रगति उल्लेख्य रहेको पर्यटनमन्त्री भानुभक्त ढकालले बताए । यी दुई अन्तरराष्ट्रिय विमानस्थल क्रमशः पोखरा र भैरहवाको निर्माणलाई तीव्रता दिई छिट्टै सञ्चालनमा ल्याउनेगरी काम भइरहेको उनको भनाइ छ । विमानस्थलमा बाँकी रहेको प्राविधिक काम पनि छिट्टै सक्ने योजनाका साथ काम अघि बढेको उनले बताए । ‘कोभिड–१९ का कारण प्राविधिक जनशक्ति अभावले केही काम बाँकी छ, त्यो समस्या पनि छिट्टै समाधान हुने गरी काम अघि बढाएका छौं,’ मन्त्री ढकाललाई उद्धृत गर्दै राससले उल्लेख गरेको छ ।
मन्त्री ढकालका अनुसार अन्य विमानस्थल पनि व्यवस्थित र स्तरोन्नति गरिनेछ । क्षेत्रीय विमानस्थलको विकास र स्तरोन्नतिका साथै अन्य विमानस्थलको स्तरोन्नति गर्ने कार्य शीघ्र अघि बढाइने उनको भनाइ छ । यस्तै अन्तरप्रदेश हवाई उडानका साथै अन्य बाह्य मुलुकसँगको हवाई सम्पर्क सञ्जाल विस्तारका लागि मन्त्रालयले योजना बनाइरहेको जानकारी उनले दिएका छन् ।
