कोरोना बीमामा फर्जी दाबीको आशंका, सात दिनभित्र विवरण बुझाउन मन्त्रालयको निर्देशन

काठमाडौं, ११ फागुन । कोरोना बीमामा फर्जी दाबीको आशंकापछि स्वास्थ्य तथा जनसंख्या मन्त्रालयले सात दिनभित्र संक्रमितको विवरण बुझाउन निर्देशन दिएको छ । कोभिड–१९ को संक्रमण पुष्टि नै नभई कोरोना बीमा दाबी गरेको पाइएको भन्दै मन्त्रालयले सम्बन्धित सम्बन्धित संक्रमितको आजभन्दा अगाडिको मितिमा परीक्षण गरिएको विवरण सात दिनभित्र पठाउन निर्देशन दिएको हो ।

कोरोना बीमा दाबीका लागि आवेदक कतिपयको संक्रमण भएको विवरण नभेटिएको र परीक्षणको मिति नमिलेकाले प्रयोगशालालाई यस्तो निर्देशन दिइएको मन्त्रालयका सहप्रवक्ता डा. समीरकुमार अधिकारीले जानकारी दिए ।

मन्त्रालयले कोभिड–१९ मितको विवरण रुजु गर्दा मित नभई पनि बीमा दाबी गरेको पाइएको उनको भनाइ छ । मन्त्रालयले १८ हजार विवरणमध्ये अहिलेसम्म १५ हजारभन्दा बढीको प्रमाणीकरण गरिसकेको छ । कतिपयले संक्रमित नभए पनि संक्रमित भनेर बीमाका लागि दाबी गरेको तथ्यांक भने एकिन नभइसकेको उनले बताए ।

प्रयोगशालाले ‘कोभिड–१९ राष्ट्रिय परीक्षण मापदण्ड’ भित्र राष्ट्रिय जनस्वास्थ्य प्रयोगशाला र इपिडिमियोलोजी तथा सरुवा रोग नियन्त्रण महाशाखा (इडिसिडी)मा संक्रमितको विवरण नपठाएको उनको भनाइ छ । मन्त्रालयले सात दिनभित्र संक्रमितको विवरण सही नपठाए कोरोना बीमा नपाउने र प्रयोगशाला जिम्मेवार रहने बताएको छ ।

Leave a Reply

Your email address will not be published. Required fields are marked *