सिद्धबाबा सडकखण्डमा सुरुङमार्गको बोलपत्र आह्वान, १० अर्ब १५ करोड बजेट सुनिश्चित
काठमाडौं, ९ जेठ । सरकारले सिद्धार्थ राजमार्गको सिद्धबाबा सड खण्डमा सुरुङमार्ग बनाउन बोलपत्र आह्वान गरेको छ । भौतिक पूर्वाधार तथा यातायात मन्त्रालय अन्तर्गतको सडक विभागले उक्त सडक खण्डमा सुरुङ मार्ग बनाउन बोलपत्र आह्वान गरेको हो ।
सुरुङमार्ग निर्माणका लागि सरकारले यसअघि स्वीस सरकारको सहयोगमा सम्भाव्यता अध्ययन र विस्तृत परियोजना प्रतिवेदन डिपिआर तयार गरिसकेको छ भने अर्थ मन्त्रालयले १० अर्ब १५ करोड रुपैयाँ बजेटको सुनिश्चितता गरिसकेको छ ।
उक्त सडक खण्डमा एउटा दोहोरो लेनको हाइवे टनेल, रक शेड संरचना, रक फल मिटिगेशन र सुरुङमार्ग निर्माणका लागि मन्त्रालयले ग्लोबल टेन्डर आह्वान गरेको हो । पैतालीस दिनको समय दिएर सुरुङमार्गको टेन्डर आह्वान गरिएको छ ।
अर्थमन्त्री विष्णु पौडेलले सुरुङ निर्माणका सबै प्रक्रिया सकेर समयमै काम शुरू हुने बताए । आयोजना निर्धारित मितिमै सम्पन्न हुनेसमेत जानकारी उनले दिएका छन् ।
उक्त सडक खण्ड प्रयोग गरेर गुल्मी, पाल्पा, अर्घाखाँची, स्याङ्जा, पोखरा, बाग्लुङ हुँदै बेनीसम्म गाडी चल्ने गर्छन् । माथिल्लो सिद्धबाबा मन्दिरदेखि दोभानसम्मको करीब चार किलोमिटर क्षेत्र पहिराको अत्यधिक जोखिममा छ । त्यसैलाई दृष्टिगत गरी माथिल्लो सिद्धबाबा मन्दिरदेखि रामापिथेकस पार्कसम्मको १ हजार ३०० मिटर क्षेत्रमा सुरुङमार्ग निर्माणका लागि भौगर्भिक अध्ययन गरिएको थियो ।
