निषेधाज्ञा खुकुलो भएसँगै दुई सरकारी संस्थानले उपभोक्तालाई दिदै आएको छुट बन्द
काठमाडौं, ९ असार । वैशाख १६ देखि जारी निषेधाज्ञा खुकुलो भएसँगै सरकारी स्वामित्वका खाद्य व्यवस्था तथा व्यापार कम्पनी र साल्ट ट्रेडिङले खाद्यन्न खरिदमा उपभोक्तालाई दिदै आएको छुट बन्द गरेका छन् । निषेधाज्ञा अवधिमा उपभोक्ताहरुलाई २० प्रतिशत छुटमा खाद्यान्न बिक्री गरिँदै आएको थियो ।
सरकारले आगामी वर्षको बजेट मार्फत निषेधाज्ञा अवधीभरका लागि यस्तो छुट दिने व्यवस्था गरेको थियो । उपभोक्ताहरुले खाद्य व्यवस्था तथा व्यापार कम्पनी र साल्ट ट्रेडिङको बिक्री केन्द्रहरुबाट नुन, तेल, चामल, पिठो, चिनी र खाना पकाउने एसटिसी ग्यास किन्दा जेठ २० गतेदेखि २० प्रतिशत छुट पाउँदै आएका थिए । परिवर्तित स्थितिअनुसार छुट दिन स्थगित गरिएको साल्ट ट्रेडिङ कर्पोरेसनका सहायक कार्यकारी अधिकृत पंकज जोशीले जानकारी दिए ।
