कोरोनाबाट निको हुने दर ९४ प्रतिशत, संक्रमणको जोखिम अझै उच्च
काठमाडौं, १९ असार । नेपालमा दोस्रो लहरको कोभिड संक्रमण घट्दै गएकोमा यसबाट निको हुने दर ९४ प्रतिशत पुगेको छ । हालसम्म ३३ लाख ५७ हजार ८२९ को परीक्षण हुँदा ६ लाख ४२ हजार ५३ जनामा संक्रमण पाइएको थियो, जसध्ये ६ लाख तीन हजार ६०० संक्रमित निको भइसकेको स्वास्थ्य तथा जनसंख्या मन्त्रालयले जानकारी दिएको छ ।
मन्त्रालयका अनुसार हाल सक्रिय संक्रमितको संख्या २९ हजार २७४ जना रहेको छ । कोभिड संक्रमणका कारण ९ हजार १८९ जनाले ज्यान गुमाएका छन् ।
संक्रमणदर घट्दै गएको भन्दै पछिल्लो समय मुलुकका अधिकांश जिल्लामा निषेधाज्ञा खुकुलो बनाइएको छ । यद्यपि संक्रमण दर केही घटेको देखिए पनि जोखिम उच्च रहेको विज्ञहरूले बताएका छन् । कोभिडको तेस्रो लहरको खतरा नजीकै आइपुगेको विज्ञहरूको अनुमान छ । सम्भवतः अक्टोबर नोभेम्बरमा नेपालमा पनि तेस्रो लहर भित्रिन सक्ने आकलन गरिएको छ । पछिल्लो खुलापनले भने त्योभन्दा पनि अगावै प्रभावित गर्न सक्ने बताइको छ ।
कोरोना भाइरसको पछिल्लो स्वरुप या प्रजातिका रुपमा देखिएको ‘डेल्टा प्लस’ यहाँ पनि देखिएको पुष्टि भएको छ । यो स्वरूपले नेपालमा धेरै प्रभाव पार्न सक्ने विज्ञहरूको आकलन छ । सर्वसाधारण जिम्मेवार भएर स्वास्थ्य सुरक्षाका मापदण्ड पालना नगरे तेस्रो लहरको संक्रमण निकै घातक हुन सक्ने चेतावनी जनस्वास्थ्यविद्हरूले दिएका छन् ।
नेपालमा समेत देखिएको कोभिडको ‘डेल्टा प्लस’ स्वरूप तेस्रो लहरको फैलावटका लागि कारक हुन सक्ने उनीहरूको ठम्याइ छ । यो भाइरसको फैलावट र असर गर्ने दुवै क्षमता अहिलेसम्मका स्वरूपको भन्दा बढी र घातक देखिएको अनुसन्धानहरूले समेत देखाएका छन् ।
नेपालमा महामारी केही घटेको, तर संक्रमणको जोखिम उस्तै रहेको भन्दै उनीहरूले पहिलेको भन्दा अझ बढी स्वास्थ्य सतर्कता अपनाउन र मानिसबीचको भौतिक दूरी कायम गर्न आग्रह गरेका छन् । अधिकांश नेपालीले खोप पाउन नसकेको अहिलेको अवस्थामा महामारीबाट बच्ने सबैभन्दा प्रभावकारी उपाय नै जनस्वास्थ्यका मापदण्ड पालना भएमो विज्ञहरूले जोड दिएका छन् ।
