चोभार सुक्खा बन्दरगाह निर्माण अन्तिम चरणमा, सञ्चालनको मोडालिटी टुंगो लगाइँदै

काठमाडौं, २१ असार । काठमाडौंको चोभारमा १ अर्ब ८० करोड लागतमा निर्माणाधीन सुक्खा बन्दरगाहको काम अन्तिम चरणमा पुगेको छ । आयोजनाको अधिकांश भौतिक निर्माण सम्पन्न भइसकेकाले आगामी आर्थिक वर्षदेखि सञ्चालनमा ल्याउन यसको मोडालिटी तय गर्न समिति गठन गरेर काम अगाडि बढाइएको इन्टर मोडल यातायात विकास समितिले बताएको छ ।

उद्योग, वाणिज्य तथा आपूर्ति मन्त्रालयका सहसचिव प्रकाश दाहालको संयोजकत्व एवं भन्सार विभाग र समितिको प्रतिनिधित्व रहेको उक्त समितिले सञ्चालनको मोडालिटीबारे टुंगो लगाउनेछ । यस्तै सुक्खा बन्दरगाह सञ्चालन गर्न भन्सार विभागले समेत कार्यदल गठन गरी भन्सार प्रयोजनका लागि आवश्यक कार्यविधि निर्माण गरिरहेको बताइएको छ ।

बन्दरगाह सञ्चालनका लागि आवश्यक संरचना बनिसकेको र बाँकी रहेका केही काम छिट्टै सकिने समितिका कार्यकारी निर्देशक आशिष गजुरेलले जानकारी दिएका छन् । यसै महिनाभित्र बन्दरगाह निर्माण सम्पन्न हुने उनले बताए ।

बन्दरगाहमा भन्सार, क्वारेन्टिन र प्रशासनिक भवन निर्माण भइसकेको छ । यसैगरी चेकजाँचका लागि तीनवटा एप्रिजल सेट, दुईवटा ठूला गोदाम, कन्टेनर यार्ड र पार्किङ यार्ड तयार भइसकेको जानकारी दिइएको छ । यस्तै बन्दरगाह प्रवेश गर्ने तीनवटा गेटको निर्माण सम्पन्न हुँदै छ ।

काठमाडौंमा बनेको सुक्खा बन्दरगाहका कारण बाहिरी देशबाट सीधै काठमाडौंमा आउने सामग्री ल्याउन सहज हुनेछ । व्यापार सहजीकरण र सामानको ढुवानी तथा ओसारपसारको लागत मूल्य घटाउन यसले ठूलो योगदान पुग्ने अपेक्षा गरिएको छ ।

Leave a Reply

Your email address will not be published. Required fields are marked *