राज्यले दिएको सहुलियतपूर्ण कर्जाको फाइदा वास्तविक कृषकहरुले लिन सक्नुपर्छ : गभर्नर अधिकारी
काठमाडौं, २२ असार । नेपाल राष्ट्र बैंकका गभर्नर महाप्रसाद अधिकारीले राज्यले दिएको सहुलियत वास्तविक किसानले लिन सक्ने व्यवस्था गर्नुपर्ने बताएका छन् । मंगलबार साना किसान विकास लघुवित्त वित्तीय संस्था लिमिटेडको २०औं वार्षिकोत्सवमा बोल्दै गभर्नर अधिकारीले राज्यले दिएको सहुलियतलाई वास्तविक कृषकमाझ पुर्याउँन आवश्यक रहेको बताएका हुन् ।
उनले यस्ता वित्तीय संस्थाबाट दिइने सहुलियत व्याजको उपभोग गर्न पनि सबैलाई आग्रह गरेका छन् । लघुवित्तले देशको वित्तीय क्षेत्रमा महत्वपूर्ण योगदान दिएको भन्दै गभर्नर अधिकारीले यस्ता संस्थालाई राज्य पनि महत्वपूर्ण रुपमा हेरेको बताएका छन् ।
त्यस्तै कार्यक्रममा बोल्दै साना किसान विकास लघुवित्त वित्तीय संस्थाका अध्यक्ष खेम बहादुर पाठकले बैंकमा सबैको महुँच नपुगेको हुँदा बैंकलाई दिइने सहुलियत लघुवित्तलाई दिनु पर्ने बताए । यसको लागि राष्ट्र बैंकको नै महत्वपूर्ण भूमिका रहने भएकाले त्यसतर्फ ध्यान दिन पनि गभर्नर अधिकारीलाई अनुरोध गरेका छन् । यस संस्थामा गरिव र पिछडिएका परिवार आवद्ध भएकाले आर्थिक विकासका लागि संस्थाको योगदान महत्वपूर्ण रहेको पनि जानकारी अध्यक्ष पाठकले जानकारी दिए ।
हाल यो संस्थाको आवद्धता ७४ जिल्लामा रहेको छ । लघुवित्तले ग्रामिण कृषकलाई प्राथमिकता दिएको साना किसान विकास लघुवित्तका प्रमुख कार्यकारी अधिकृत डा. शिवराम प्रसाद कोइरालाले जानकारी दिए । कोभिडका कारण आफ्ना सदस्य संस्थालाई केही असर गरेको भएपनि वित्तीय सूचकमा भने मनग्य प्रगति भएको उनको भनाई छ ।
