सुपर आँखुखोला जलविद्युत आयोजनाले अवैध वन फडानी गरेको भन्दै स्थानीयको विरोध
काठमाडौं, ३ साउन । धादिङको रुवीभ्याली गाउँपालिकास्थित सुपर आँखुखोला जलविद्युत आयोजनाले अनधिकृत तबरले आयोजनाका लागि बाटो बनाउन वन फडानी गरेको भन्दै स्थानीयले कारवाहीको माग गरेका छन् । शोधभर्ना र क्षतिपूर्ति बिनै करिव एक हजार रुख काटिएको भन्दै रुवी भ्याली गाउँपालिका वडा नम्बर ४ र ५ स्थान्ीयले प्रधानमन्त्री तथा मन्त्रीपरिषद्को कार्यालयलाई पत्राचार गरेका छन् ।
उनीहरुले यसअघि वन विभागलाई पत्राचार गरेपनि खासै चासो नदिएको गुनासो गरेका छन् । यसमा स्थानीय सरकार, प्रदेश सांसद एवं जिल्लास्थित जिल्ला वन कार्यालयको मिलेमतो रहेको स्थानीयको आरोप छ ।
२५.४ मेगावाटको यो आयोजनाले रुवी भ्याली गाउँपालिकाको वडा नम्बर ४ र ५ मा बाटो बनाउने नाममा ती रुख काटिएको हो । त्यसबापत अन्यत्र एक काटिएको रुख बराबर २५ वटा विरुवा रोप्ने, पाँच वर्षसम्म त्यसको हेरदेख र सम्भार गर्ने वा सो कामवापत भरणपूरण रकम दिने कुनै काम आयोजनाले गरेको छैन ।
