कैलाली भन्सार कार्यालयले गत वर्ष लक्ष्य भन्दा बढी राजस्व संकलन गर्यो

धनगढी, ८ साउन । कैलाली जिल्लामा कैलाली भन्सार कार्यालयबाट राजस्व सङ्कलन गत आर्थिक वर्ष २०७७÷०७८ मा लक्ष्यभन्दा बढी भएको छ। कैलाली भन्सार कार्यालयबाट लक्ष्यभन्दा धेरै राजस्व सङ्कलन भएको कार्यालयले जनाएका छन् ।

कैलाली भन्सार कार्यालयले लक्ष्यभन्दा झण्डै १०७ प्रतिशत बढी राजस्व संकलन गरेको छ । गत आर्थिक वर्ष २०७७÷७८ मा कैलाली भन्सार कार्यालयलाई आठ अर्ब २१ करोड रुपैयाँ राजस्व उठाउने लक्ष्य लिएकामा आठ अर्ब ८४ करोड रुपैयाँ राजस्व उठेको कैलाली भन्सार कार्यालयका भन्सार सुचना अधिकृत अम्बीका केसीले जानकारी दिए । कैलाली भन्सार कार्यालयबाट गत वर्ष पेट्रोलियम पदार्थ, ट्र्याक्टर, खाद्यान्न तथा फलफूलजस्ता वस्तुको आयात धेरै भएको र सबैलाई कदरको दायरामा ल्याउन प्रयास निरन्तर गरिरहेको केसीले बताईन ।

त्यस्तै भन्सार सुचना अधिकृत केसीले वार्षिक राजस्व संकलनको आकार बढ्नुमा भन्सारको आन्तरिक कार्यविधिमा भएको सुधार, जाँचपास प्रणालीमा भएको स्तरियता र चोरी पैठारी नियन्त्रण तथा न्युनिकरणको प्रभाव रहेको बताईन । गतवर्षभन्दा यसवर्ष आयातमा पनि वृद्धी भएकाले पनि लक्ष्यभन्दा बढी राजस्व संकलन गर्न सकेको उनको भनाई रहेको छ ।

आगामी कार्ययोजनाको विषयमा बोल्दै केसीले यसवर्ष भन्सार कार्यालय कैलालीको कार्यप्रणालीमा सुधार, प्रवृधिको अत्याधिक प्रयोग र सुरक्षा निकायसँग समन्वय गरी चोरी पैठारी तथा तस्करीका गतिविधिमा नियन्त्रण गर्दै यथार्थ राजस्व संकलनमा केन्द्रित हुने बताईन ।