श्वेतपत्र जारी गर्दै अर्थमन्त्रीले भने ‘अर्थतन्त्रका सबै समस्या समाधान गर्दै सम्बृद्धिको बाटोमा अघि बढ्छौ’
काठमाडौं, १६ चैत । सरकारका तर्फबाट अर्थमन्त्री डा.युवराज खतिवडाले मुलुकको वर्तमान आर्थिक स्थिती र भविष्यमा चाल्नुपर्ने रणनीति सहितको श्वेतपत्र जारी गरेका छन् । संघीय संसदमार्फत जारी गरेको श्वेतपत्रमा मुलुकको विद्यमान अर्थतन्त्रकाबारे जानकारी दिइएको छ ।
संसदमा स्वयतपत्र जारेपछि अर्थमन्त्रालयमा आयोजित पत्रकार सम्मेलनमा उनले बजेट अनुशासन कायम हुन नसक्दा देशको ढुकुटी रितो हुने अवस्थामा पुगेको जानकारी दिए । मुलुकको अर्थतन्त्र चुनौतीपूर्ण मोडमा रहेको भन्दै मन्त्री खतिवडाले गैरबजेटरी खर्च नियन्त्रण हुन नसकेको बताए । मुलुक संघीयतामा गएसँगै प्रशासनीक खर्च बढेपनि राजस्वको दायरा संकुचित भएको उनले बताए ।
त्यस्तै व्यापारघाटा बढ्दै जानु, रेमिट्यान्सको आप्रवाहदर घट्नु, पूननिर्माण लगायत अन्य विकास निर्माणका कामहरु सुस्त हुनु समस्या आएको बताए । मन्त्री खतिवडाले अर्थतन्त्रमा देखिएका समस्याहरुलाई समाधान गर्दै सुशासन र दु्रत आर्थिक विकास मार्फत सम्बृद्धिको यात्रा प्ररम्भ गर्न उपलब्ध स्रोत, साधन र अवसरलाई सरकारले उपयोग गर्ने बताए । उच्च आर्थिक बृद्धिका लागि लगानी र त्यसको उत्पादकत्व बृद्धि गर्ने र यसका लागि स्वदेशी तथा विदेशी पूँजी परिचालनका लागि अनुकुल नीति तथा व्यवस्थापकिय सुधार गर्ने कार्यको सुरुवात गरिसकेको पनि उनले जानकारी दिए ।
