चालू आवको १६ दिनमा सरकारको राजस्व आम्दानी २६ अर्ब ४८ करोड

काठमाडौं, १७ साउन । चालू आर्थिक वर्ष (आव)को १६ दिनमा सरकारको राजस्व संकलन करिब साढे २६ अर्ब पुगेको छ । महालेखा नियन्त्रक कार्यालयका अनुसार शनिवारसम्ममा कुल राजस्व संकलन २६ अर्ब ४८ करोड रुपैयाँ रहेको छ, जुन चालू आवको बजेटमार्फत लिइएको वार्षिक लक्ष्यको २.३ प्रतिशत हो ।

नयाँ सरकारले श्वेतपत्र ल्याइनसकेको अवस्थामा यसअघिको सरकारले अध्यादेशमार्फत ल्याएको बजेट अनुसार वार्षिक राजस्व संकलन ११ खर्ब ५१ अर्ब ६० करोड रुपैयाँ हुने लक्ष्य रहेको छ । श्वेतपत्र ल्याएर नीति तथा कार्यक्रम संशोधन भएमा स्वाभाविक रूपमा बजेटको आकार र राजस्वको लक्ष्य समेत परिवर्तन हुने देखिएको छ ।

साउन १६ सम्ममा कर राजस्व २५ अर्ब ८० करोड रुपैयाँभन्दा बढी संकलन भएको छ, जुन कर राजस्व संकलनको विद्यमान लक्ष्यको २.४९ प्रतिशत हो । कर राजस्व असुलीतर्फ हालको लक्ष्य १० खर्ब ८३ अर्ब १९ करोड रुपैयाँ रहेको छ ।

सोही अवधिमा गैरकर राजस्व असुली ६७ करोड ५२ लाख रुपैयाँ रहेको छ, जुन विद्यमान वार्षिक लक्ष्यको ०.६ प्रतिशत हो । गैरकर राजस्व संकलनतर्फ चालू आवको लक्ष्य १ खर्ब १३ अर्ब ४० करोड रुपैयाँ रहेको छ ।

Leave a Reply

Your email address will not be published. Required fields are marked *